Kun Biyaan Mo Ako

Kun Biyaan Mo Ako

by Suzeth Mayormita Angana

Pinangga, kun biyaan mo ako

Mag-unsa na man lamang ang kinabuhi ko?

Kun biyaan mo ako,magsubo gayod ako

Kun biyaan mo ako, magpunay ako sa pagbakho

Kun biyaan mo ako, wala nay bulok ning kinabuhi ko

Kay ikaw man ang kalipay ug gihigugma ko

Kun biyaan mo ako, magpunay ako sa pagpangita kanimo

Kay dili ako makasugakod halayo sa kiliran mo

Kun biyaan mo ako,mapuno ako sa kamingaw

Huna-huna ug dughan ko mubati ug kakuyaw

Kay pinangga ako gayod nga gikahadlukan

Nga tingali ikaw pagasakmiton sa uban

Pinangga, kun biyaan mo ako

Mag-unsa na man lamang ang atong mga panaad ug damgo

Gipanumpaan ta sa usag-usa

Nga mag-inunungay kita sa bisan unsang taknaa

Saksi kadtong mga nagpangidlap nga kabituonan sa kalangitan

Nga ikaw ug ako adunay gipanumpaan

Panumpa nga wala namugna aron pakyason

Kundili panumpa nga angay gayod nga tumanon

Kun biyaan mo ako, magbakho kining kasing-kasing ko

Kay ang pagbiya mo, mao man ang paghubas ning kalipay ko

Kun imo gayod akong biyaan, apason ko ikaw sa bisan asang suok ning kalibutan

Sundon ko ikaw arun sa kanunay magdug-ol ang atong mga dalan

Buhaton ko gayod ang tanan arun ikaw kanunay kong makauban

Kay dili ko makaya nga muabot ang takna nga imo akong pagabiyaan

Ikaw ang giisip kong kapikas ning akong dughan

Kay ikaw lamang ang gihigugma niini ug natingban

Kun biyaan mo ako, magmalipayon pa ba kaha ako?

Makatugot ka ba diay nga magmagul-anon ako?

Kun biyaan mo ako, asa na man ang padulngan ko?

Kun biyaan mo ako, maglumbana sa kamingaw kining dughan ko

Kun biyaan mo ako, sama ra nga mawad-an ako sa tanang paglaom

Kay sa imong presensiya kanunay man akong maghandom

Kun biyaan mo man galing ako, ayaw ako padungga sa imong panamilit

Arun dili magpabilin sa dughan ko ang tumang kasakit

Kun biyaan mo ako, ayaw ako palauma sa imong pagbalik

Ayaw ako patuoha sa imong mga atik-atik

Gugma ni Nanay ug ni Tatay

Gugma ni Nanay ug ni Tatay

by Suzeth Mayormita Angana

Gugma ni Nanay ug ni Tatay

Ginailhan nga gugmang tiunay

Gugma ni Nanay ug ni Tatay

Pagbati nga gihulma diha sa kalipay

Ang gugma ni Nanay ug ni Tatay

Gugma nga naghugpong sa usa ka panimalay

Gugma nga sa tanan tang kapakyasan makahupay

Gugma nga wala ang pagbalibaray ug pinugsanay

Kun sud-ungon mo ang ilang panagway

Masilip mo ang dili masukod nga kalipay

Ilabi na nga makita kamo nila nga ilang mga anak

Ang ilang mabatyagang kalipay, matuod ug dili bakak

Kalipay nila nga magsud-ong nga kamo anaa sa matarong nga dalan

Kay palabihon man gayod nila ang tanan alang sa inyong kaayuhan

Andam nilang isakripisyo ang ilang kaugalingon

Kay gusto nila nga masungkit ninyo ang mahayag nga kaugmaon

Kun masayop kamo, badlungon ug giyahan kamo nila

Arun makaamgo ug makahuna-huna kamo sa inyong mga kasaypanan

Buhaton nila ang pagpakita kaninyo sa ilang gugma

Ug ang inyong mga problema, pangitaan nila ug kasulbaran

Dili nila ikatugot nga kamo makatunob sa hiwi nga dalan

Kay pangandoy nila nga kinabuhi mo magasubay sa kaayuhan

Buhaton nila ang kutob sa ilang mahimo

Arun kaharuhay ug kadagaya sa unahan imong masungko

Adunay mga panahon sa imong kinabuhi

Nga kamo ug sa inyong Nanay ug Tatay magkasumpaki

Dili ikalimod nga makasukol kamo nila

Ug sila usab makapanakit kaninyo ug istorya

Masuko man kaninyo si Nanay ug si Tatay

Apan dili kini makalabaw sa ilang gugma alang kaninyo nga walay pagkalanay

Makaluwat man sila ug masakit nga mga pulong

Apan angay kamong masayod nga matag higayon kanunay kamo nilang gibulong

Lantawa ang imong kaugalingon karun

Bunga kana sa gugma ni Nanay ug ni Tatay nga malungtaron

Hinumdumi sa kanunay nga gugma nila kaninyo walay paglubad

Mao man gani nga sa inyong mga paghangyo dili sila makabalibad

Sama sa tubig sa kadagatan

Ang ilang gugma nga dili mahubsan

Sama kataas sa kapanganuran

Ang ilang gugma nga dili gayod katugbangan

Ang gugma ni Nanay ug ni Tatay

Diha kaninyo kanunay nag-apong ug nagbantay

Gugma ni Nanay ug ni Tatay makapaalim sa dughan tang nagsakit

Kay ang ilang gugma tambal nga dili mapalit

Ang gugma ni Nanay ug ni Tatay gugmang dili kabayran ug salapi

Gugma man kini nga sa mga materyal nga butang dili ikatandi

Gugma nga wala magpaabot ug sukli

Gugma nga may dakong gibug-aton ug bili

Mahanaw man bisan ang tanan mong mga kabtangan

Apan kanunay magpabilin ang ilang pag-atiman

Mahimong mutalikod kanimo ang imong mga kahigalaan

Apan si Nanay ug si Tatay kanunay nga anaa diha sa imong kiliran

Pagkabililhon gayod sa gugma ni Nanay ug ni Tatay

Kay gugma, pagpangga ug pag-atiman man kini nga wa'y pagkapusgay

Hinuktuki sa makadaghan kun gugma nila imo bang nasuklian

Dili pa ulahi ang tanan ipakita usab kanila nga bililhon sila diha sa imong dughan

Working Student

'WORKING STUDENT”

by Suzeth Mayormita Angana

Bililhon ba alang kanimo ang edukasyon?

Andam ka ba nga ang kalisod pagapapason?

Daghan sa mga kabataan karon

Ang edukasyon wala gayod nila maangkon

Tungod kini sa kalisod sa kinabuhi

Mao nga ang edukasyon wala na lang gahini ug bili

Apan dili angay himoon nga dakong rason

Nga tungod sa kalisod dili na lang isipon ang edukasyon

Tungod niini, nakabaton ako ug paglaom ug kusog

Nga kalisod sa kinabuhi kini mabuntog

Naggagikan ako sa pamilya nga matawag tang dili dato

Apan wa ko kini himua nga hinungdan aron sa tibook kong kinabuhi anaa ang pagmulo

Sa nahuman ko ang pag-eskwela sa sekondarya

Nagmalaumon ako nga sa kolehiyo ako makaeskwela

Nangita ako ug pamaagi nga makab-ot ko kini

Ug andam antuson ang mga pagsulay nga nag-alupiti

Nakaeskwela ako dungan ang pagtrabaho

Adunay mga panahon nga pagsulay masugatan ko

Mga pagsulay kun diin mahimong muhatod kanako sa kaparutan

Apan kinahanglan anaa ang kaisog aron dili maalaot sa kaulahian

Isip usa ka working student, kinahanglan magbaton ug kakugi

Kakugi nga nagsukad sa kasing2x ug pag-eskwela gahinan gayod ug bili

Isip working student, anaa gayod ang kakapoy

Apan ayaw ug padala aron sa unahan ikaw dili mahimong makaluluoy

Batuni ang pagkatawo nga maisog

Aron mga pagsulay yano lang nga mabuntog

Sa natad sa pagtuon ug pagtrabaho

Anaa gayod ang kasaba nga maggikan sa amo

Apan ayaw katarantar ug pagsurrender

Kay ang magmalampuson kato lamang musalir

Ang kinabuhi sa working student sama sa naglatay sa lanot

Kay kini nagtakuban ug pagsulay nga mutabon daw sama sa pukot

Anaa ang kaluya nga kanunay magsunod-sunod

Apan kinahanglan magmaisog aron kini sa kinabuhi dili musulod

Kinahanglang magpaubos sa kaugalingon

Aron kalampusan sa kinabuhi sa unahan imong maangkon

Ayaw ikaulaw ang imong pagtrabaho

Bisan sa pagpanglimpyo ikaw maggunit ug hugaw nga trapo

Bisan anaa ka na sa kolehiyo

Batuni ang mapaubsanon nga pagkatawo

Ayaw hatagi ug lugar ang pagtamay sa uban

Kay dili nila kinabuhi ang kinabuhi mong gihuptan

Ipasigarbo ang imong pag-eskwela ug pagtrabaho

Kay diha sa imong pag-antos, kalampusan sagad maangkon mo

May mga panahon nga dili mo kapugngan nga mutulo imong mga luha

May mga panahon nga ikaw makabsan sa kwarta

Dili gayod kalikayan nga magkutoy imong tiyan

Apan antusa lamang kay anaa sa unahan nagpahipi ang imong kalampusan

Ayaw kalimot sa pagpangamuyo sa matag adlaw

Aron di makawang ang mga plano nga imong gilaraw

Batuni gayod ang pagkatawo nga mainampuon

Arun ang mga pagsulay sa imong kinabuhi mulabay lang sa dayon

Ayaw pagtikang sa tunokon nga mga dalan

Arun di makawang ang imong mga gipaningkamutan

Ang kinabuhi sa working student puno sa pagsakripisyo

Pagsakripisyo nga muhatod kanimo aron makab-ot mo ang imong damgo

Kinahanglan adunay kay determinasyon

Arun sa ingun ikaw gayod magmalampuson

Paabota bisan unsa kadugay mahuman ka sa imong pag-eskwela

Huna-hunaa lang nga bisan unsa kadugay sa kutay sa panahon kini mulabay ra

Alang sa mga kabatan-unan gihagit ko kamo

Nga bisan sa kalisod, mahimo ninyong makab-ot ang inyong mga damgo

Ayaw huna-hunaa ang kalisod

Kay sa kaayohan kini kanimo dili magtukmod

Pangita ug pamaagi arun ang edukasyon maangkon

Kay diha sa edukasyon, anaa ang mahayag nga kaugmaon

Dapat aduna usab kamoy kakugi ug determinasyon

Arun sa imong kinabuhi mabatunan mo ang pagkamalampuson

Alang sa mga working student nga sama kanako

Padayon kamo kutob sa inyong mahimo ug dili sagad mahimo

Pagmalig-on ug salig sa Diyos sa kanunay

Arun maangkon ta gayod kalampusan nga tinud-anay.

Binilanggo Nga Pagbati

-->

BINILANGGO NGA PAGBATI

by Suzeth Mayormita Angana

Binilanggo nga pagbati akong naangkon

Sa dihang gugma ko alang kanimo dili ko masugilon

Gipaningkamotan ko nga mahibaw-an mo kini

Bisan mga ngabil ko sa mga pulong dili makasulti

Gibuhat ko ang pagpakita kanimo sa akong pagbati

Pinaagi sa maayong pagtagad ug maayong buhat ko ikaw makasinati

Apan adunay utlanan ang akong pagtagad diha kanimo

Kay ikaw gipanag-iya naman sa laing tawo

Gusto kong ipahibalo sa kadaghanan

Nga ikaw ang bugtong binuhat nga nagtinggakol ning akong dughan

Gaawas-awas kining paghigugma ko unta diha kanimo

Apan unsaon ko man nga pagbati ko usa man ka binilanggo

Binilanggo kining pagbati ko alang kanimo

Tungod kay wala ako'y igong katungod sa pagpadayag niini diha kanimo

Unsaon ko man nga ikaw masayod

Kun ikaw sa bisan unsang paagi dili ko na magukod

Binilanggo ang pagbati ko alang kanimo

Kay sa bisan unsang paagi pagbati lisod ng masayran mo

Saksi unta ang mga kalangitan ug kabituonan

Nga ikaw lamang ang binuhat nga akong pakamatyan

Nga hangtod sa katapusan kong gininhawa

Ikaw ra gihapon ang binuhat nga manag-iya ning akong gugma

Naghaguros daw sama sa hangin ang akong gugma diha kanimo

Ug daw sama sa bul-og sa baha kining pagbati ko

Apan malisod gayod nga ikaw niini mahibalo

Kay binilanggo man ang pagbati ko

Maglisod ako sa pagladlad niini sa imong atubangan

Kay sa bisan unsang paagi pagbati ko dili mo masaksihan

Binilanggo ang pagbati ko kay kini dili man masugid diha kanimo

Binilanggo kining pagbati ko kay wa ka nay kagawasan nga ikaw maako

Binilanggo ang pagbati ko kay kini dili makalingkawas

Sa makusganon ug mahait nga mga rehas

Mga rehas nga nagpasumbingay nga ako giulang na diha kanimo

Malisod gayod nga ikaw makahibalo sa mga panaad ko

Malisod nga matagamtaman mo ang pagpangga ko kanimo

Malisod na nga musalingsing ang paglaom alang kanato

Kay kini gitabunan na man sa dagami sa kalimot

Kay ikaw nabihag na man sa laing pukot

Ug nagkahulugan ug nagmatuod kini

Nga ikaw di ko na gayod mabawi

Gitulon ko ang nagpamahit nga kahapdos niining akong dughan

Ug gidawat sa hingpit kining kapakyasan nga akong gidangatan

Naglumbana sa kaguol kining ako pagbati

Ug nagmalaumon nga ikaw kanako mahiuli

Gusto ko nga sa kalipay kita mag-kauban

Sa mga pag-amuma ikaw akong mahalaran

Sa mga pagsulay ug pagtamay gusto ko nga ikaw panalipdan

Ug makauban hangtod sa katapusan

Apan dakong kawang kining tanan

Kay ikaw dili na makabati sa pinitik ning akong dughan

Dili mo na mahangop ang akong paghigugma kanimo

Kay kini usa man ka binilanggo

Lisod kaayo ang pagdawat sa kamatuoran

Nga magpabilin nga binilanggo ang akong nabatyagan

Gipaninguha ko nga huypon ako sa makusog nga hangin paingon sa imong kiliran

Aron sa binilanggo ko nga pagbati imo gayod nga masaksihan

Kawang lamang ang tanan ko nga mga pangandoy

Nga mahatag mo kanako ang imong kaluoy

Nga bisan binilanggo kining akong pagbati

Sa hinay-hinay ikaw niini makasinati

Maupos na lamang ang matag palid sa katuigan

Apan ako nagpabilin nga sa gugma gihikawan

Naangkon ug natagamtaman ko kini

Kay diha kanimo binilanggo man kining akong pagbati

Lingla

LINGLA

by Suzeth Mayormita Angana

Lingla... nagtakuban kini ug mapait nga resulta

Lingla... nagpahipi kini sa madanihon nga mga istorya

Lingla.... nagbaton kini ug mapait nga kapaingnan

Lingla... luha ang maangkon mo sa kaulahian

Usisaha ang imong kaugalingon kun sa lingla

Ikaw nakaangkon ug nabiktima na ba

Huna-hunaa sa makadaghan kun kanus-a ka nalingla

Maihap ba sa mga tudlo ang higayon nga nalingla ka

Lingla... tipik ug kabahin kini sa atong kinabuhi

Gusto man kini nato o dili

Ang lingla kanunay sa palibot ta nagpahipi

Nga mahimong mudasmag bisan kanus-a sa atong pagpakabuhi

May lingla nga dili mo mailhan

Kay kini nagpakita ug mini nga pagtulun-an

Mahimong malingla ka sa imong paghigugma

Mahimong malingla ka kabahin sa imong kwarta

Mahimong malingla ka bisan asa

Mahimong malingla ka bisan kanus-a ug sa bisan unsang paagiha

Ayaw dayon pataka ug dawat sa nagkalain-laing sugyot nga ihatag sa usa ka tawo

Ilabi na sa dili mo kaila, kay kini mahimong may dautang tumong ug tuyo

Sa panahon karun, uso na kaayo ang pagpanglingla

Kay bunga kini sa kalibutan nga nagkagulang na

Adunay mga katawhan nga hilig kaayo mangbiktima

Ug gamiton gayod nila kining ginatawag ug pagpanglingla

Matnguni sa makadaghan nga ang lingla kanunay nagsunod-sunod

Arun kinabuhi ta sulayan ug mahimong lumpagon gayod

Misanay ang lingla kay kahimtang sa katawhan anaa sa kalisod

Mao nga nakaako sila nga kinabuhi nila sa lingla isugnod

Mahimong mahitabo ang pagpanglingla kabahin sa ekonomiya

Mahimong mahitabo ang pagpanglingla sa miyembro sa pamilya

Aduna sa'y lingla nga kabahin sa relasyon

Aduna sa'y pagpanglingla sa gobyerno ilabi na sa naghupot ug posisyon

Mao nga kita kanunay magmabinantayon

Arun sa pagpanglingla kita dili gayod maulipon

Kinahanglan batunan ta ang saktong pangisip

Arun sa pagpanglingla kita dili mahilakip

Lisod kaayo kun kita anaa sa gahom sa lingla

Kay kinabuhi ta dili makabaton ug kadagaya

Bulahan kadtong wala magmahuyangon

Arun pagpanglingla kinahanglan gamiton

Ayaw hatagi ug higayon nga ikaw sa lingla mahimong instrumento

Kay kining maong kahimtang dili kanimo makahatag ug kaayo

Lisod ang mabiktima sa lingla

Ug mas labing lisod kun ikaw usa ka manglilingla

Paningkamoti ug maayo inubanan sa pangaliyupo

Nga ikaw sa lingla dili mahidugmo

Kay ang lingla usa ka dakong tentasyon

Nga mahimong muguba sa atong kaugmaon

Isilsil ta sa atong kasing-kasing ug alimpatakan

Nga pagpanglingla dili ta gayod sudlan

Ug alang sa tanan ang lingla angay natong likayan

Arun kinabuhi ta dili mahitumpawak sa kadautan

Magpakabuhi ta dinhi sa kalibutan

Nga sa pagpanglingla kita dili sad-an

Dapat mong bantayan ang imong pagkatawo

Arun ikaw dili mabitik sa lingla sa ubang tawo

Sakit kaayo kun ikaw malingla

Huyhoy ang imong abaga kun ikaw gilingla

Mao nga pagmatngon kanunay

Nga sa gahom sa lingla ikaw gayod makalikay

Ipatigbabaw ang kamatuoran diha sa imong kinabuhi

Arun sa mga lingla ikaw dili makabig ug madani

Hinumdumi sa makadaghan ug kanunay

Nga kun wala kanimo ang lingla ug niini ikaw naglikay

Maangkon mo ang dili kabayran ug sapi nga kalipay.

Pagmahay

PAGMAHAY

by Suzeth Mayormita Angana

May pagmahay ba nga mag-una?

May pagmahay ba nga mupatim-aw sa sayo pa?

May pagmahay ba nga matagamtaman mo sa permero pa?

Siyempre ang pagmahay sa katapusan mo ra makita

Naluwat ko kining maong mga pangutana

Ug natubag ko kini sa ibabaw sa katapusang linya

Tungod kay ang maong pagmahay ako mang naangkon

Niadtong mga panahon nga nalingla ako sa usa ka maluibon

Nabatunan ko ang hilabihang pagmahay

Kay kasing-kasing ko nagun-ob sa hinay-hinay

Napukan sa makadali ang bantugan ko nga pagbati

Diin pagkamaaghop ko niadtong maong binuhat, yano lang gihikli

Wa ako magdahom nga sa kadugayan iya diay akong pagalinglahon

Kay nakita ko man kaniya sa permero ang pagkamatinud-anon

Nahaylo ako sa temporaryo niyang pagpangga

Ug ang pagkamalumo kaniya ko man nakita

Gibisibisan niya ako sa maayong pagtagad

Ug gidalitan sa kinasing-kasing nga pag-alagad

Gipuno niya ang kinabuhi ko sa tumang kamaya

Ug gitagaan sa matam-is niyang pahiyom ug mga hadla

Gibuligan niya ako sa mga pasalig ug panumpa

Nga pagminahalay namo dili gayod mahalukapa

Ug mipasalig pa siya sa makadaghan

Nga pagbati ko dili gayod masamaran

Niadtong mga higayona nga wa pa kami relasyon

May lain sab nga binuhat nga sa pagbati ko nagmalaumon

Ang maong binuhat naghambin usab ug maayong kinaiya

Nga mitandog usab sa nagpuyo kong paghigugma

Nakadesisyon na unta ako nga sugton ang maong binuhat

Apan! Nakino ang maong desisyon kay may lain usab nga sa tubag ko naghulat

Nagduha-duha ako niadtong mga higayona

Kun kinsa nilang duha ang tugyanan ko sa akong paghigugma

Sa kaulahian aduna na gayod ako'y napilian

Gipili ko siya nga usa ka ambongan

Gipili ko siya kay mas hitsuraan siya

Gipili ko siya kay natintal ako sa madanihon niyang mga mata

Gipili ko siya kay maayo kaayo siya mupalabtik ug mga pulong

Ug abi ko bag wala gayod siya kanako'y gililong

Sa maong pagpili, aduna na diay ako'y napasakitan nga pagbati

Gipasakitan ko ang laing binuhat nga makahatag unta kanako ug dakong bili

Naguba ko ang nahinanok unta niyang mga tunglo

Ug diin nakahimo siya pagluwat diri kanako

Nga sa kiliran sa binuhat nga akong gipili

Luha ug kasakitan ang akong maani

Gibaliwala ko ang iyang gipanulti

Kay nagtoo man ako nga di makawang ang akong pagbati

Nasinatian ko ang tumang kamaya sa permero pa

Apan luha ang akong naangkon sa nagkadugay na

Ang binuhat nga ako untang gipili

Mao man hinuon ang mikunis-kunis sa akong pagbati

Gihan-ok niya ang kasakit nga naglagiti

Kun diin dughan ko nabun-og na ug nagisi

Gusto kong isinggit sa tibuok kalibutan

Ang dakong pagmahay nga akong nahiaguman

Ako nagmahay kun nganung nalingla ako

Ako nagmahay kay karun luha man ang naangkon ko

Nagmahay ako sa makadaghan kun nganung kaniya ko pa man

Gitugyan ang matinud-anon nga pagmahal ning akong dughan

Nagmahay ako sa matag takna nga mahinumduman

Ko ang tanan ko nga mga kasakitan ug kapakyasan

Kapakyasan nga nagsukad niadtong binuhat nga akong gimahal

Nga diay sa ngadto ngadto siya ra diay ang sa kasing-kasing ko mibunal

Nagmahay gayod ako sa kaulahian kay ako iya man nga gibiyaan

Nihupas ang matam-is niyang pagtagad ug iya akong gitalikdan

Pagmahay...... ako karung nahiaguman

Pagmahay.......karun sa kinabuhi ko wa gayod mitaliwan

Pagmahay....... karun ang naghari sa akong dughan

Kay ang pagmahay sa katapusan lamang matagamtaman

Walay pagmahay nga mupahibalo kun kanus-a muabot siya

Walay pagmahay nga mupatim-aw sa permero pa

Walay pagmahay nga mag-una

Kay ang pagmahay ulahi na..

Nganu?

NGANU

by Suzeth Mayormita Angana

Oh! nganu? Nganung nabati ko man kini

Nganung pagbati ko wa mo man hiilhi

Nganung wa mu man tagda

Ang kasing-kasing ko nga kanunay nagpuasa

Nganung gibalewala mo man

Ang akong pag-antos ug mapait nga kasinatian

Nganung padayon mo mang gilangkat

Ang kasing-kasing nga kanimo lamang nagahulat

Nganung padayon mo man nga kasing-kasing ko gilatos

Nganung halos kasakitan man kanunay kanako imong gipaantos

Nganung sa matag higayon perme mo man akong gipaselos

Nganung kamaya sa kasing-kasing kanako wa mo gipahimulos

Nganung kanunay mo mang gikastigo ang akong kasing-kasing

Nga kini kanimo lamang unta adunay pagbagting

Nganung gibanlas mo man ang akong kakugi

Aron unta sa akong balaan nga paghigugma ikaw makasaksi

Nganung padayon ka man nga mipahilayo kanako

Tan-awa! Kasing-kasing ko gibati ug pagmulo

Nganung pilit mo mang gihulipan sa kaguol ang akong klipay

Ug kinabuhi ko guba na ug di na halos mapanday

Nganung milugnot ka man niadtong higayon nga gihawiran ko ikaw

Nga unta gipaningkamutan ko man nga sa kinabuhi ko ikaw dili mahanaw

Nganung mibalibad ka man kanako

Sa tanan kong mga paghangyo ug pangamuyo

Nganung pulos kagul-anan man ang gisukli mo sa akong paghigugma

Nga unta kamaya sa kinabuhi nanlimbasog ako arun kanimo igasa

Nganung kapakyasan man ang bugti sa akong pagpangga kanimo

Nga unta luha mo wa man unta gipatulo ko

Nganung tanan kong mga pagpaningkamot arun makauban ka

Wala mo hatagi ug gibug-aton ug importansiya

Nganung nagpakabuta-bungol ka man nga ako kanimo nahigugma

Kay diay sa pagtagad kanako wala kay gana

Nganung sa matag higayon nga mupaduol ako kanimo

Pilit mo usab buhatan ug rason aron mupahilayo ikaw kanako

Nganung di mo man lang ihatag kanako

Bisan usa ka pugnit nga pagbati nga malumo

Nganung sa tanan kong pagpaubos diha kanimo

Perme mo mang ipataas ang kaugalingon mo

Nganung tanan nga mga maayong butang nga akong gihalad

Ikaw wa gayod magpakabana ug magmanggad

Nganung wala mo man ako balibari sa dayon

Aron kasing-kasing ko unta diha kanimo dili sa pagtagad mo magmalaumon

Nganung padayon mo mang gipabati kanako

Nga pagbati ta dili gayod mahimong magkatakdo

Nganung ikaw pa man ang akong gipangga

Nga kun sa kaulahian, kaayo ko dili mo diay makita

Nganung nabati ko man diha kanimo ang tim-os nga paghigugma

Kun kini wala nimo tagda ug kinahanglana

Nganu? Nganu man nga mao kini akong gedangatan

Nganung mao man kini akong napupo sa kaulahian

Nga unta ako nagmatinud-anon man unta kanimo

Nganung di mo man kayahon ang paghigugma kanako

Tubaga ako! Nganu?!!!