Gikalimtan Mo Na Ba Diay Ako?

-->

Gikalimtan Mo Na Ba Diay Ako?

by Suzeth Mayormita Angana

Ang kinabuhi ko karun nahulom sa kamingaw

Ang pagbati ko karun walay padulngan ug naglatagaw

Kanunay akong naghandom sa mga higayon nga kita nagkauban

Ang pagpunay ug paghandom kanimo nagbunga sa tumang kasakitan

Pilit kong gipaningkamutan nga kalimtan ka

Kay sayod ako nga diha kanimo, ako wala mo handuma

Sakit hangpon ang kamatuoran nga ako walay gibug-aton diha sa imong dughan

Sakit huna-hunaon nga ako diay imo namang gikalimtan

Ang atong hamubo nga panag-uban, wala mo hatagi ug bili

Kay sayod man ako nga sa paghigugma dili ako ang imong gipili

Wala ako'y igong katungod arun angkonon ka

Ni gihuptang katungod arun sa pagdani sa uban mapugngan ka

Wala ako'y katungod pagdumala diha kanimo

Kay dili man ako ang tag-iya nianang kasing-kasing mo

Gusto ko man unta nga ikauban ka pag-usab

Apan sayod ako magpunay ka man lamang ug gahin sa imong pagbalibad

Matag buka ning akong mga mata sa sayong kabuntagon

Kanunay kining nagpangita ug naghandom sa imong kaugalingon

Apan unsaon ko man... nga ako diay gikalimtan mo na man

Unsaon ko man... nga ako diay walay luna ug kataguan diha sa imong dughan

Gidawat ko nga ubos lang ako ikumpara sa uban

Sayod ako nga uyamot lamang kining akong kapalaran

Kung hitsura ang pagabasihan, mabutang gayod ako sa kinaulahian

Ug ako dili makahatag kanimo sa mga kabtangan

Wala ako'y ikapasigarbo ug ikagasa kanimo

Gawas niining tim-os ug matuod nga pagbati ug pagpangga ko

Kalipay ko nga mahibaw-an mo nga ako may pagbati unta kanimo

Apan padayon ka mang mipalayo dinhi ning kinabuhi ko

Dili ko na gani mapakita kanimo kining dako kong paghigugma

Kay dili ko naman ikaw makita ni makauban pa

Gipaningkamutan ko man unta nga ilubong ko ikaw sa kalimot

Apan napupo ko man hinuon nga dughan ko wala mahimuot

Matod ning huna-huna ko, kalimtan ka na

Apan nakigtigi kining dughan ko nga padayon nga higugmaon ka

Huna-huna ko nagtiyabaw nga ibaliwala ka na

Apan kasing-kasing ko nagbakho nga dili kaya nga isurender ka

Wala ka man unta'y gibug-aton ning akong kinabuhi

Apan sa dihang nakauban ka, natugkan man ako sa tim-os nga pagbati

Gibaliwala ko man unta ikaw sa sinugdanan

Apan karun diay ikaw naman ang nagtingkagol ning akong dughan

Wala ka na ba diay mahinumdom pa kanako?

Wala mo ba diay hatagi ug pagtagad nga pagbati ko alang kanimo nahimugso?

Karun, wala ka na nga mahinabi ko

Wala ka na nga muhatag ug pahiyom ug kalipay ning dughan ko

Gikalimtan mo na ba diay ako?

Kay wala mo na man ako hatagi nianang pagtagad mo

Nabatyagan ko karun nga imo akong gikalimtan diha sa panumduman mo

Kay wala ka na man gayod magpakabana pa kanako

Gikalimtan mo na ba diay ako?

Kamatuoran nga lisod madawat ning kasing-kasing ko

Kay nakat-on na man unta ako sa pagmahal kanimo

Ug kanimo ko na lamang mabati ang kalipay ning dughan ko

Gikalimtan mo na ba diay ako?

Haw-ang na gayod kining kinabuhi ko

Ikauban ko na lamang ikaw sa akong mga damgo

Kay tataw na kaayo nga ako diay gikalimtan mo.

IKAW ANG AKONG KASANDIGAN

IKAW ANG AKONG KASANDIGAN

by Suzeth Mayormita Angana

Ikaw ang akong kasandigan

Sa panahon nga tanan

Ikaw ang akong kasandigan

Sa panahon sa akong kalisdanan

Ikaw ang akong kasandigan

Kun mangahanaw man kanako ang tanan

Ikaw ang akong kasandigan

Ning dughan kong nagmasulub-on ug samaran

Sa panahon sa tumang kasakitan

Anaa ka nga akong kasandigan

Anaa ka nga musapnay ning nagmaluya kong balatian

Anaa ka nga kasugiran ug akong kasumbungan

Sa panahon nga anaa ako sa lawod sa kasubo

Ikaw lamang ang makahupay ning dughan ko

Sa panahon sa akong mga pagbakho

Anaa ka nga muhapuhap sa akong tangkugo

Sa mga bulawanon mong mga tambag

Ang paglaom sa kinabuhi akong nahibalag

Mabatyagan ko man usahay ang kalaay

Apan anaa ka nga mupasig-uli ning akong kalipay

Anaa ka nga mutukag sa kinabuhi kong nag-alihid

Sa kanunay giubanan mo ako sa kinabuhi nga nagligid

Muhasmag man kanako ang kasakitan nga binaid

Kining tanang kakulian kong naangkon kanimo ko lamang masugid

Ikaw ang nagahatag ug bulok ning akong kinabuhi

Kay paglaom ko wa matakilpo ni mabali

Kay anaa ka man nga kasandigan ning gikapoy kong balatian

Anaa ka nga kaduolan panahon sa kahigwaos ug kasakitan

Nagtapun-og daw sama sa mga bato

Ang gidaghanon sa mga problema nga mihasmag kanako

Nabug-atan na kining akong dughan

Apan mapasalamaton ako nga kanunay mo akong giubanan

Gisalo mo ang kaugalingon ko nga napuno sa pagmulo

Giduyogan mo ako panahon sa kasubo

Giagak mo ako paingon sa matul-id nga dalan

Aron paglaom sa kinabuhi akong mapalgan

Gitultulan mo ako nga makita ang kahayag

Kay kaniadto kinabuhi ko nagusbat ug nagkatag

Kaniadto nag-alirong kanako ang kadulom sa kinabuhi

Nga nakapaluya kanako aron nga magpakabuhi

Gibitad mo ako aron makalingkawas ako sa kangitngit

Aron mabati ko ang kalipay gikan sa langit

Nabuhi ang nagkaawop kong paglaom

Kay ikaw kanako kanunay nagpahinumdom

Nga dinhi niining kalibutana

Adunay kasulbaran ang tanan tang mga problema

Tanang pag-antos ug kasakitan

Adunay utlanan ug katapusan

Gipasig-uli mo ang kamaya ning kinabuhi ko

Tungod sa tabang ug pagpangga mo

Anaa ka nga kasandigan panahon sa kahaw-ang

Anaa ka nga kasandigan bisan pagsulay sa unahan nagaatang

Dili masukod ni maihap ang kahigayonan

Nga ako imong giayudahan ug gitabangan

Linibuan ka pagpasalamat ang akong ipabati kanimo

Kay sa kinabuhi ikaw ang kasandigan ko

Kun Katudluan Ko Pa Lang ang Kasing-kasing Mo

-->

Kun Katudluan Ko Pa Lang ang Kasing-kasing Mo

by Suzeth Mayormita Angana

Ikaw ang binuhat nga akong gihigugma

Ikaw lamang ang sulod ning akong huna-huna

Ikaw ang tanan alang kanako

Apan gugma mo, sayod akong dili kana ma ako

Sakit dawaton ang gibukhad nga kamatuoran

Nga ikaw gibati ug gugma sa uban

Saksi ako sa imong mga mata

Nga kaniya ikaw may dakong paghigugma

Makita nako sa imong panagway

Nga siya ang giila mong kalipay

Mapasigarbuhon kang misugid nga gihigugma mo siya

Sa akong nadunggan, dughan ko baling sakita

Gipamulong mo pa nga kasing-kasing mo adto lang mupitik kaniya

Ug pagbati ko kanimo wala mo na gayod makita

Kun katudluan ko pa lang ang kasing-kasing mo

Tudluan ko kana aron ako ang higugmaon mo

Kun katudluan ko pa lang ang kasing-kasing mo

Hangyoon ko nga ako na lamang unta ang panggaon mo

Apan wa ako'y mahimo kay dili man kana katudluan

Kay ang kasing-kasing adunay kaugalingong prinsipyo ug baruganan

Sa matag takna nga mabati ko nga malipayon ka sa iyang kiliran

Mag-aginod sa kahapdos kining akong balatian

Kay ang paghigugma mo sa uban

Mao ang pagkapukan ug pagkasamad ning akong dughan

Hinay-hinay nga muligdas ang mga lugas ning luha

Kun ikaw ug sa maong binuhat akong makita

Kay sayod ako nga sa inyong panagkuyog

Pagbati ninyong duha nagkaduyog

Sama ra nga giambakan ang akong dughan

Niaanang nagtapok nga mga bato sa kadalanan

Kay iyang kamot imo mang gigunitan

Ug gibutang mo kini sa imong dughan

Akong namatikdan nga gipabati mo kaniya

Nga siya lamang ang gipangga mo ug gihigugma

Gipakita mo usab kaniya ang imong pagkamatinud-anon

Kay sa paghigugma dili ka man maluibon

Pagkaanindot baya kun ako ang anaa sa iyang dapit

Aron unta dili ko mabatyagan kining maong mga kasakit

Kasing-kasing ko naluya na ug nagping-it

Kay sa imong dughan siya man ang kanunay nga gisampit

Gihandom ko sa makadaghan nga ako ang higugmaon mo

Gipangandoy ko nga pagpangga mo maangkon ko

Apan akong nadawat kanunay ang dakong insulto

Kay dili ako ug siya man diay ang gihigugma mo pag-ayo

Usa ka dakong kapakyasan ug kapildihan sa gugma

Kay siya alang kanimo, ug ikaw alang kaniya

Kun katudluan ko pa lang ang kasing-kasing mo

Sayod ako nga ako ang pilion ug higugmaon mo

Apan pakyas man ako nga ma ako ka

Kay gugma ug pagbati ko kanimo wa mo na panumbalinga

Ang akong presensiya imo mang gibaliwala

Kay dili man ikaw ug ako ang gitakda

Kun katudluan ko pa lang ang kasing-kasing mo

Ikaw ug ako ang maghigugmaay

Apan imposible pa kining mahitabo

Kay diay siya man ang bugtong mong kalipay

PANAGBANGI SA MANAGTI-AYON

PANAGBANGI SA MANAGTI-AYON

by Suzeth Mayormita Angana

Lalaki: Oh akong Inday, nganong nagusbat man kanang imong dagway? May nabuhat ba ako nga nakapapas sa imong kalipay? Tan-awa ang atong balay, nagkatag man kining mga butang ug hinayhay. Ug gani, wala ko na mabatyagan nga aduna kay hustong pag-atiman sa gingbuhaton ning atong panimalay, kay diay ikaw ug sa atong silingan kanunay mang nag-estoryahanay ug naghinung-hungay.

Babaye: Kasakit ba nianang mga gipamulong mo. Wa mo ba diay makita ang pag-amuma ug pagtagad ko kaninyo? Sa sayong kabuntagon, mudali-dali ako pagbangon, arun kamo makakaon, nagluto sa mga kalan-on aron ikaw ug atong mga anak dili gutomon. Sa ingon niana ka sayon, mao kana ang isudya mo ngari kanako? Huh! Daan pa ko, mao dayon kana ang imong maistorya kay nakadimdim ka man diay ug bahal nga tuba.

Lalaki: Wa na! Gipasanginlan mo na pud ako. Wa ako maghubog-hubog kay gihatagan ko ug dakong bili ang trabaho. Nagkugi ako alang kanimo, mikayod ako aron mahatagan kamo sa pang-inadlaw-adlaw nga panginahanglanon; ug aron sa ingon makatagamtam ang atong mga anak ug makabaton ug mahayag nga kaugmaon. Mao ba kana ang ibalos mo kanako, ang masakit nga mga pulong nga imong gipunting kanako?

Babaye: Wa ka lang makasabot... Kay dayon ka man ug bagutbot. Timan-i nga kanimo, wa ako mahimuot kay sa imong mga barkada ikaw mihapit ug pakigsandurot.

Lalaki: Gituis mo man dayon ang gipanag-istoryahan tang duha, nga unta gihisgutan ta kabahin lang man sa atong pamilya. Nangita ka man ug bikil kay pasagad ka man lang ug sugid kanang imong mga pasangil.

Babaye: Kahait ba nianang mga pulong mo; sukwahi na man gayod kana niadtong mga saad mo. Kaniadto, sa bag-o pa tang nagminyo, pinalangga mo ako kaayo. Apan karon, sagad ko nang mabati nga pasakitan mo ako nianang mga pulong mo. Dakong bakak kadtong gipanumpaan ta, kay karon kasakit man ang gipatagamtam mo.

Lalaki: Kalayo na gud nimo ug gihisgutan. Nagsipok na gayod kining akong ulo sa imong mga pinulongan. Ayaw ako ingna nga ako kanimo nagbakak sa akong mga panumpa; kay pagmatuod ko kanimo sa akong saad dili makalabaw sa nahimo kong kalapasan ug sala. Ayaw isipa nga kadtong mga giluwat ko kaniadto pulos ra kadto ulo-ulo, kay gani gihigugma ko man ikaw pag-ayo lakip ang mga anak ko.

Babaye: Dong, pasayloa ako, kay wa ako makahatag sa akong pasensiya diha kanimo, niulbo man gud dayon ang akong kalagot sa dihang mga pagbagulbol imong nasulti sa dihang ikaw ganiha miabot.

Lalaki: Oh! Akong Inday, pasayloa usab ako sa nasugid ko kanimo, sa tinuod lang nakainom bitaw ako ug usa ka baso nga bahal mao kadtong miinit ang akong dunggan ug ulo, hinungdan nga gisapot ako. Apan karon, nahuwasan na ako, hinaot nga mapasaylo mo ako.

Babaye: Hingsabtan ko ikaw... andam ako kanunay nga sa imong pagpasabot maminaw. Dili man gayod kalikayan nga kita magkasumpaki, kay mao man kini mupalig-on sa nagkaduyog tang pagbati.

Lalaki: Husto ka sa imong giingon, isip managti-ayon, paningkamutan tang panag-uban ta magmalig-on. Dili kita magpadala sa mga pagsulay aron ang atong panimalay manimuyo binukharan sa pagsinabtanay ug kalipay. Balikon ta pagsugid ang atong saad ug panumpa sa usag-usa...

Lalaki ug Babaye: Kasakit ug kalipay yayungan tang duha.

BIKTIMa

BIKTIMA

by Suzeth Mayormita Angana

May kapuslanan pa ba ang kinabuhi ko? May kapuslanan pa ba human panamastamasi ang akong pagkatawo? Pagkaalaot kong pagkanilalang kun diin ako sa pag-abuso nalaang. Sa way igong rason ug katuyuan, pilit niyang gidimdim ang batan-ong mga rosas ug gipupo sa dili saktong oras. Hagit man kining akong nahiagoman apan wa akoy igong kusog aron kini pagabalibaran. Supak man ang akong kaugalingon sa maong sitwasyon, apan usa lamang ako ka binuhat nga mahuyangon. Pilit niyang gipasipad-an ang nanalingsing kong pagkatawo. Linghod pa unta kini daw sama sa nanurutot nga mga pinugas sa kaumahan. Nga malipayong nagpaabot sa ulan aron kini motubo ug pagaanihon sa saktong panahon. Apan way kaikag ang maong nilalang, diin iyang gihabwa ang nagpuyo kong dignidad. Daw sama ra nga gibanlas ako sa makusog nga tuyaw sa kapalaran diin pagkatawo ko yano lamang gipasipad-an.

Dili ko na mabalik ang nangagi na tungod kay kini nahulpa ug nalumpag na. Unsa man kining akong naangkon? Nganong nakaako man ang maong binuhat nga kalinghod ko iyang giangkon. Wa siyay baruganan tungod kay pagbalibad ko wala niya paminawa ug tagda. Aduna pa unta akoy dakong damgo ug plano sa kinabuhi ko. Apan unsaon ko man pagkab-ot ang maong pangandoy, kun pagkatawo ko dagtom pas aso. Daw sama ra nga gisalibay ako ngadto sa mga walog sa mga luha ug kasakit kun diin di ko na man gane mabaniog ang sulbad niining maong hagit. Nakabsan na ako sa paglaom tungod niining butang nga akong naangkon. Naangkon ko ang hilabihang kapait niining kinabuhia, diin akong nabatyagan nga sa pag-antos niini ako nag-inusara. Pait daw panyawan kining akong naani, kinabuhi ko gubot pas lukot ug wa nay silbi. Igo na kining tanan! Asa man diay ang utlanan niining tanan?

Usa niana ka higayon, nakaplagan ko ang solusyon niining dakong problema nga akong naangkon. Diin ako usa ka binuhat nga biktima sa pagpanamastamas sa akong pagkaako. Inanay nga misalingsing ang nitaliwan ko na untang paglaom. Nanlimbasog ako pagbalik aron magpakabuhi nga normal. Magpakabuhi nga puno sa paglaom ug pagmaya. Pilit kong gilubong sa kalimot ang trahedya nga akong nasinatian tungod kay ug ako kadtong tagaan ug dakong bili ako ra ang maalaot sa unahan. Bililhon ang magpakabuhi bisan nagtakuban kini ug mapait nga kasinatian, kay samtang ania pa kita niining kalibutana, anaa ang hagit sa kinabuhi. Mubarog kita nga malig-on aron pagpakabuhi ta sa kalibutan dili maanugon.

Ang Pagbati sa Linghod nga Kasingkasing

Ang Pagbati sa Linghod nga Kasingkasing

By Suzeth Mayormita Angana


Ang pagbati sa usa ka linghod nga kasingkasing
Daw sama kini sa kampana nga kanunay magbagting
Tinuyo man kini o dili
Ang linghod nga kasingkasing puno sa nag-awas-awas nga pagbati.

Lisod tukibon sa mga pulong ang gugma nga mabatyagan
Sa usa ka binuhat nga may linghod nga kasinatian
Ug lisod usab mahubad kun unsa ang linundagan niining tanan
Tungod kay ang linghod nga kasingkasing di pa klaro ang padulngan

Mahimong sa una grabe pa kini mahigugma
Ug sa usa ra gayod kini ka binuhat muhatag ug paghigugma
Apan sa walay igong katuyuan ug rason
Mahimong ang tanang paghigugma mahanaw sa dayon

Nasayod ba ikaw kun unsa ang hinungdan niining tanan?
Nga kadaghanan sa mga kabatan-onan dinhi sa kalibutan
Naghambin ug susamang pagbati, nga sa una ra mugana
Ug sa magkadugay murag wala ra

Tinuod ba ang ginaingon niadtong mga nakasinati
Nga kun magkadugay magkalami?
Ang buot kong ipasabot, nga magkadugay ang gugma
Kini mahimong hapsay ug pwerteng chadaha

Maihap lamang sa mga tudlo ang mga binuhat
Nga nakasinati ug gugma nga wala gilangkat
Kay kasagaran sa panahon karon
Ang linghod nga kasingkasing may pagbati nga maluibon

Sa duha o tulo pa ka bulan ang relasyon
Hapsay pa ang kasinatian nga maangkon
Apan sa magkataas ang kutay sa panahon
Ang gugma mahimong samok ug dili na halangdon

Dili mo mapugngan ang pag-usab sa pinitik sa linghod nga kasingkasing
Tungod kay kini may kaugalingong istilo ug timing
Mabuhat mo man ang kutob sa tanan mong mahimo
Apan maglisod ikaw pag-usab sa bagting sa pagbati sa usa ka tawo


Mahimo kining handumanan sa usa ka awit
Diin ang ubang mga binuhat kanunay gayod makarelate
Ug sa uban usab mao kini ang ilang suliran
Diin usab sila nagaantos ug nag-agulo sa grabeng kasinatian


Makaingon ka usahay ug tagam
Niadtong mga binuhat nga dili pa unta andam
Nga mudawat ug mutulon ug paghigugma
Apan wa kay laban, mapugngan pa ang baha nungka ang gugma

Ang uban nagamahay ug nganong sila gibati ug kasakit
Tungod sa pagbati nga sa ilang dughan kanunay nagpamahit
Ilabi na niadtong mga katawhan nga may hingkod pang pangidaron
Diin sila maglisod pagkontrol sa ilang kaugalingon

Dili pud sa ingon nga ang hingkod nga paghigugma
Walay bili ug ang tanan lumalabay ra
Naa may ginatawag nila nga sa gugma may swerte
Ug tinuod man nga sa uban nahitabo gayod kini

Ang importante nga kun ikaw musulod ug gugma
Usisaha nga ang imong kaugalingon kabalo muagwanta
Tungod kay ang gingharian sa gugma dili sa tanang mga panahon
Nga ikaw magalakaw sa mga dalan nga binakbakan sa mga rosas ug dahon

May mga panahon usab nga ikaw
Daw sama sa binuhat nga gikuso-kuso
Sa makusog nga unos ug hagit sa kapalaran.
Mao nga kinahanglan matngonan mo kini pag-ayo.

Ayaw dayon pataka ug palingla sa mga matam-is nga pulong
Nga ipangladlad niadtong mga binuhat nga maambong
Pilia ang matuod nga pagbati kaysa hitsura
Aron sa kaulahian sa imong paghigugma dili ka mag-inusa ra

Mas mayo nga sa imong pagmahal dili ra ikaw ang gibati
Dapat ang tawo nga imong gimahal kanimo usab may pagbati
Pilia ang binuhat nga may baruganan
Aron ikaw dili gayod magmahay sa kaulahian

Alang sa mga kabatan-onan nga may hingkod nga pangidaron
Kun mahimo sa paghigugma kamo kanunay magmatinarungon
Aron matawag sa kadaghanan nga ang pagbati
Sa usa ka linghod nga kasingkasing importante ug may dakong bili.

Ang Gugmang Napakyas

Ang Gugmang Napakyas

By Suzeth Mayormita Angana

Tim-os nga pagbati ang nabatyagan
Niining nag-inusara kong dughan.
Ilawom sa hagip-ot nga tuyaw sa panahon
Kini kanunay nagmalig-on ug nagmalaumon.

Nga ugma damlag kining kasingkasing ko
Makahinagbo ug binuhat nga sama kanimo.
Apan sakit dawaton ang kamatuoran
Nga ikaw malisod hikalimtan

Tumang kahapdos ug kangilo kanunay magtiyabaw
Niining dughan ko nga way pagkabanhaw
Sama ra ako nga nagbitay sa togdan sa sibuyas
Tungod kay gipriso ko man ang gugma kong napakyas.

Dili kaya sa akong akong kasing kasing
Nga isurender ang gugma kong balimbing
Tungod kay tiunay nga gugma ang akong nabatyagan
Ug walay si bisan kinsa nga makapapas niini sa akong panumduman

Usahay bation ko gani ang tumang pagmahay
Kun ngano nga mitugot man ang hanging kanaway
Nga bitaron ug iduot ako padulong diha kanimo?
Nga unta sa kalibutan dili ra man ikaw ang nag-inusarang tawo?

Daw sama sa balas sa kabaybayonan ang lalaki dinhi sa kalibutan
Apan kanimo ko lamang napalgan
Ang matuod nga kahulugan sa pulong gugma.
Ang gugma nga walay paglubad ug pagkamala.

Unsaon ko man pagbakwi ang tim-os nga pagbati?
Kung ang akong kasingkasing usab nagdumili?
Nga iluwa kining bahal nga pagbati
Nga migitib daw sama sa usa ka binhi

Pagkaalot ko nga pagkabinuhat
Nga sa dihang kasing kasing ko kanunay lamang gilangkat
Kanunay ako mahatingala nga sa ubang tawo
Nganong daghan man ang mag-agulo

Ug maglagas ug magbugtaw sa ilang gugma?
Nganung wala man gayod sa akua?
Nganong permi lamang ilaha?
Karun ug ugma kanunay lamang ilaha?
Oh! Gugma kong napakyas!
Unsaon ko man ikaw pagpalayas?
Buot kong ilubong sa kalimot kung unsa man akong nabatyagan
Apan wa ako’y igong kusog nga kasing kasing ko pagamandaran.

Daw sama ako sa usa ka gapas
Nga bisan asa huypon sa hangin, muapas
Wa ako’y igong kaikag nga isalibay ko sa kalayo kining tanan
Kay mao man kini bugtong ikapanghambog sa akong dughan.

Ibalewala ko na lamang ang tuyaw sa mga katawhan
Nga ako paganganlan ug babaye nga sa gugma nabiyaan.
Ihilak ko na lamang sa hilom kining tanan
Kay ang gugma ko nga napakyas wala may kinutoban.

Ang bugtong ko lamang pagabuhaton
Mao ang pagpaabot sa hustong panahon
Hangtod nga mahinagbuan ko ang matuod nga tugbang
Niining gugma ko nga way pagkasalop ug pagkasubang.


Maupos man ang matag palid sa kalendaryo
Ako kanunay magpaabot sa hustong tawo
Nga maoy makahatag kanako sa matuod nga pagbati
Diin way pagkahanaw ug pagkasuhi.

Matag gutlo, kanunay akong nagmalaumon
Nga may binuhat nga masalaag pag-ingon
“Ikaw ang akong gugma, ug kanimo ko lamang igasa
Kining pagbati ko sa imuha ra gayud may pag-amuma”

Pagkasuwerte ko baya kun kini matinuod
Apan sa tan-aw ko, wa nay chansa nga ako makasukagod
Sa pag-atubang ug paghambin ug gugma
Tungod kay alang kanako, ang gugma sa mga tawo lumalabay ra.

Ang gugma sa usa ka tawo, daw sama usa ka butang nga lumalabay ra
Bisan unsa pa kini katim-os ug katiunay, apan may takna nga kini mahanaw ra,
Mao nga kun si kinsa man ang may kasinatian nga sama kanako,
Ayaw kamo pagpakawa sa paglaom, ayaw kamo pagmulo

Kay kun palad mo way swerte sa gugma,
Mahimo nga sa tibuok mong kinabuhi “WALA GUD KAY SWERTE SA GUGMA”
Huna-hunaa na lamang ug hinumdumi sa makadaghan nga ikaw may hiyas
Nga usa ka higayon sa imong kinabuhi ikaw may GUGMA, apan kini NAPAKYAS!