Luha

-->

LUHA

by Suzeth ayormita Angana

Luha, natagamtaman mo na ba?

May luha ba nga midaligdig sa imong mga mata?

Luha, bunga ba kini sa pagmahay?

Luha, bunga ba kini sa kalipay?

Ang luha nagsimbolo sa usa ka yano nga butang

Apan kun maangkon mo kini, kasing-kasing mo mura ug matangtang

Ang matag lugas sa atong mga luha

Adunay nagkalain-lain nga kahulugan nga gipakita

Kun biniyaan ka, mutulo gayod ang imong luha

Kun sinalikway ka, magtubod usab ang imong luha

Sa panan-aw sa kadaghanan

Ang luha bunga gayod sa masakit nga kasinatian

Mahimong pugngan mo ang pagtulo sa imong mga luha diha sa imong mga mata

Diha sa imong mga pagbakho, mahimo mong itulon ang imong mga luha

Apan ang luha simbolo gayod kini sa tumang kasakitan

Bisan pugngan mo pa kini ug dili ipakita sa uban

Ikaw nakabaton ug luha tungod kay samdan ang imong balatian

Ikaw naghambin ug luha kay gugma mo gisayangan

May luha nga miagay sa imong mga mata tungod sa tumang kaguol

May luha nga miipsot sa imong mga mata kay kasing2x nagbagulbol

Luyo sa mga luha nga imong masinati

Aduna kini kalipay nga sa unahan nagpahipi

Maagian mo ang pagtulo sa imong mga luha

Aron kalipay sa unahan masinatian mo ug makita

Walay makalikay niining maong bantugan nga butang

Nga gitawag ug luha, kay sa mata mo kanunay kining magpaatbang

Ilabi na gayod ug makino ang nahikatulog mong kahiubos

Ug mas labaw pa kun kasing-kasing mo sa kasakit nagaantos

Luha, mutulo kun pakyas ka sa paghigugma

Luha, mutulo kun kanimo wala gayoy mualima

Luha, muagay kun kasing-kasing mo nagmaluya na

Luha, muagay kun luhaan ang imong kasing-kasing

Ang luha gikan sa kasing-kasing nga migawas sa atong mga mata

Arun mapakita niini nga pag-antos sa kasing2x haska na gayong sakita

Dili sayon kapugngan ang mga luha

Kay kini muipsot lamang sa bisan kanus-a nga takna

May pipila ka mga binuhat nga sa luha kanunay nakasinati

Kay gidasmagan sa mga kasakit nga naglagiti

Sakit kaayo pamation kun luha imong maangkon

Kay mapapas ug mahanaw gayod ang imong pagkamalipayon

May ginatawag nga luha sa kalipay

Apan mas kasagarang mahitabo ang luha sa pagmahay

Ampingi kanunay ang imong kaugalingon

Arun luha dili mo kanunay maangkon

Ampingi gayod kanunay ilabi na ang imong dughan

Arun sa luha ikaw dili mahuluman

Hapdos ang imong dughan kun may luha diha sa imong mga mata

Sakit iginhawa kun luha nanggunit na diha sa pilok sa imong mga mata

Nagbakho ug nagluha ka ba karung mga higayona?

May luha ba nga nagpahipi karun diha sa imong mga mata?

Ayaw kana pugngi, patulua kana

Arun mabatyagan mo ang kalipay sa umaabot nga mga ugma

Kun nagtulo ang mga luha mo karun

Kay sa kapakyasan ug kaalautan ikaw naulipon

Paniguroha nga ugma damlag ug sa umaabot nga mga panahon

Luha dili mo na kanunay masinatian ug maangkon.

Mabugnaw Nga Kagabhion

MABUGNAW NGA KAGABHION

by Suzeth Mayormita Angana

Sa takna nga musalop na ang adlaw ngadto sa kasadpan

Ug mutikyop na ang kahayag ug sa kangitngit gipulihan

Ug lamyon niini ang nagpahipi nga kahayag

Aron sa ingun matagbo ang umaabot nga laing buntag

Hinay-hinay nga muhuyop ang mabugnaw nga hangin

Nagpamatuod nga sa kainit kini naghingilin

Muhinay-hinay usab pagkanaog ang mga taloto ngadto sa yuta

Kay inig salop sa adlaw sa ilang pagrespeto sa kahitaas-an mupakita

Maglumbaanay pagbatog ang nagkadaiyang kalanggaman

Ngadto sa mabagang sanga sa kakahuyan

Ug madungog ang nagkaguliyang nga tingog sa ihalas nga mga mananap

Kay ang kahayag inanay nga sa kangitngit gihikap

Padayon ang paghuyop sa makapanugnaw nga hangin

Ug ang kabugnaw sa kaunuran magpabilin

Higupon niini ang kainit nga gibuga sa adlaw

Kay ang kainit sa adlaw sa kagabhion dili na mupatim-aw

Mao kini ang takna sa mabugnaw nga kagabhion

Nga mupakiyugpos sa tagsa-tagsa tang mga bukton

Ang kabugnaw sa kagabhion nga musuhop sa atong kalawasan

Nga mupatumba kanato sa atong higdaanan

Kabugnaw sa kagabhion kay mihuyop man ang hangin gikan sa amihanan

Mabugnaw nga kagabhion kay ang sinag sa adlaw dili na makit-an

Diha daplin sa nagdaguok nga tubig sa kasapaan

Ang kabugnaw sa kagabhion imo gayong mabatyagan

Kay diha anaa ang lapyo nga mga dahon

Nga nag-ugom sa mga yamog bunga sa mabugnaw nga kagabhion

Nagtabisay ang mga yamog tungod sa kabugnaw

Kabugnaw sa kagabhion nga nagpangamay sa katugnaw

Mikuyugpos ug mikolo ang mga dahon sa tanaman

Kay sa kabugnaw sa kagabhion kini gihabulan

Gibukotan sa kabugnaw ang tibook palibot

Kay ang kainit sa kalit lamang nahanaw ug nahurot

Mihupas ang inadlaw nga kainit sa katubigan

Kay mikanaog man ang kabugnaw nga hilabihan

Kabugnaw nga makapakurog sa atong mga tuhod

Kabugnaw daw sama diha sa mga tubod

Kabugnaw nga mukusi sa atong mga panit

Kabugnaw nga sa tumang katugnaw mihagit

Kabugnaw nga muhapuhap sa atong mga aping

Kabugnaw sa kagabhion nga kanato makapaigking

Kabugnaw nga mubira kanato sa atong pagtukaw

Kabugnaw nga mupalubog sa atong mga panan-aw

Kay danihon man niini ang imong mga mata arum mutikyop

Kay ang haring adlaw sa hingpit misalop

Mukanaog ang kabugnaw ngadto sa kayutaan

Gikan sa hataas nga kapanganuran

Ug lukpon niini ang tagsa tagsa tang tugkaran

Arun kabugnaw sa kagabhion atong matagamtaman

Kabugnaw sa kagabhion lisod kaayong huypon

Kabugnaw sa kagabhion dili nalim antoson

Ilabi na ug walay musandig diha sa imong mga bukton

Ug ilabi na gayod kun mag inusa ra ikaw panahon sa kagabhion

Pagkaanindot kun ikaw may kauban

Sa panahon sa mabugnaw nga kagabhion

Arun dili ka sa kabugnaw maurupan

Kay ang mabugnaw nga kagabhion, kabugnaw nga dili masayon sayon

Balod Sa Yuta

BALOD SA YUTA

May balod ba diha sa yuta?

May balod, apan kini usahay dili ta makita

Mga balod nga nagkahulugan sa malig-on nga kamatuoran

Nga andam kini nga kinabuhi sa tawo pagabukotan

Mga balod nga muhampak matag karun ug unya

Mga balod nga sa kalibutan ta nagpataliwala

May mga panahon nga linaw pa sa lana ang atong mabatyagan

Apan muabot gayod ang mga balod nga muuyog sa atong kapalaran

Ang yuta nagsimbolo sa mamala

Apan may mga balod kini nga gitagana

Dinhi sa yuta, mabatian ta ang mga balod sa kasakit

Anaa gayod ang mga balod nga nagpaninggit

Anaa ang makusog nga huyop sa mga pagsulay

Nga magtukmod arun muulbo ang mga balod luyo sa atong kalipay

Mga balod nga kanato mahimong mulumos

Mga balod nga nagkahulugan sa mga kasakit ug mga pag-antos

Diha sa lapyahan sa tagsa-tagsa tang kinabuhi

Anaa ang mga balod dinhi sa yuta nga nagpungasi

Daw sama sa mga balas dinha sa kabaybayonan

Ang mga balod sa yuta nga mahimo tang masinatian

Nga kini dili maihap sa atong mga tudlo

Nga kapila kini musugat ug muhasmag ngari kanato

Wala kini gipili nga panahon kun kanus-a kini mupatim-aw

Kay usahay sa mga kaisog ta mutunaw

Mga balod sa yuta nga muhatod kanato sa mahait nga kabatuan

Nga mahimong musamad sa atong mga balatian

Diha sa lawod ning atong kinabuhi

Anaa ang mga balod nga kanunay nagpahipi

Mga balod nga manggula dinhi sa yuta

Mga balod nga usahay dili mu gayod matugkad ug masuta

Sa bisan asang suok ning gipuy-an tang yuta

Anaa nag-apong nga mga balod arun kanato muhadla

Mga balod nga mahimong mutumpag sa atong kalig-on

Mga balod nga mupapas sa atong pagkamalipayon

Ang mga balod sa yuta mas hait pa kay sa mga balod sa kadagatan

Kay ang balod sa yuta, mga balod nga naghulagway sa mga pagsulay ug kasakitan

Mga balod nga mubanlas panahon sa atong kahigwaos

Mga balod nga musudya sa panahon sa atong mga pag-antos

Mga balod nga muyubit kun sa kusog kita nawad-an

Ug ang pagtoo ta sa pagka way paglaum gipulihan

Balod sa yuta, mga balod nga dili kalikayan

Mga balod nga dili ta gayod kataguan ug kabalibaran

Ang kinabuhi ta, gikaluhaan ng daan

Ning mga balod sa yuta nga nag-atang kanato sa unahan

Mga balod nga musulay sa atong kusog

Arun sa ingun makamao kitang mubarog

Matumba man kita sa paghampas sa mga balod

Apan paningkamutan ta nga kita makasugakod

Kay ang tanang balod dinhi sa yuta nga atong maangkon

Kini may katapusan ug mahanaw lamang kini sa dayon

Kun anaa ang mga sulog nga mutuok kanato

Anaa usab ang kalinaw nga maangkon ta pinaagi sa pagpangaliyupo

Gamhanan ang mga balod nga anaa sa yuta

Apan mas gamhanan kadtong binuhat nga niini nagmugna

Batuni kanunay ang pagsalig sa kahitas-an

Kay Siya lamang ang may gahom nga mubuntog niining tanan

Bulahan kadtong adunay pagsalig ug pagtoo

Pagsalig nga way pagkabugnaw sama sa kalayo

Magmadaugon kadtong nagbaton niining hiyas sa kinabuhi

Kun mga balod sa yuta dili lamang gayod hatagan ug dakong bili.

Gikalimtan Mo Na Ba Diay Ako?

-->

Gikalimtan Mo Na Ba Diay Ako?

by Suzeth Mayormita Angana

Ang kinabuhi ko karun nahulom sa kamingaw

Ang pagbati ko karun walay padulngan ug naglatagaw

Kanunay akong naghandom sa mga higayon nga kita nagkauban

Ang pagpunay ug paghandom kanimo nagbunga sa tumang kasakitan

Pilit kong gipaningkamutan nga kalimtan ka

Kay sayod ako nga diha kanimo, ako wala mo handuma

Sakit hangpon ang kamatuoran nga ako walay gibug-aton diha sa imong dughan

Sakit huna-hunaon nga ako diay imo namang gikalimtan

Ang atong hamubo nga panag-uban, wala mo hatagi ug bili

Kay sayod man ako nga sa paghigugma dili ako ang imong gipili

Wala ako'y igong katungod arun angkonon ka

Ni gihuptang katungod arun sa pagdani sa uban mapugngan ka

Wala ako'y katungod pagdumala diha kanimo

Kay dili man ako ang tag-iya nianang kasing-kasing mo

Gusto ko man unta nga ikauban ka pag-usab

Apan sayod ako magpunay ka man lamang ug gahin sa imong pagbalibad

Matag buka ning akong mga mata sa sayong kabuntagon

Kanunay kining nagpangita ug naghandom sa imong kaugalingon

Apan unsaon ko man... nga ako diay gikalimtan mo na man

Unsaon ko man... nga ako diay walay luna ug kataguan diha sa imong dughan

Gidawat ko nga ubos lang ako ikumpara sa uban

Sayod ako nga uyamot lamang kining akong kapalaran

Kung hitsura ang pagabasihan, mabutang gayod ako sa kinaulahian

Ug ako dili makahatag kanimo sa mga kabtangan

Wala ako'y ikapasigarbo ug ikagasa kanimo

Gawas niining tim-os ug matuod nga pagbati ug pagpangga ko

Kalipay ko nga mahibaw-an mo nga ako may pagbati unta kanimo

Apan padayon ka mang mipalayo dinhi ning kinabuhi ko

Dili ko na gani mapakita kanimo kining dako kong paghigugma

Kay dili ko naman ikaw makita ni makauban pa

Gipaningkamutan ko man unta nga ilubong ko ikaw sa kalimot

Apan napupo ko man hinuon nga dughan ko wala mahimuot

Matod ning huna-huna ko, kalimtan ka na

Apan nakigtigi kining dughan ko nga padayon nga higugmaon ka

Huna-huna ko nagtiyabaw nga ibaliwala ka na

Apan kasing-kasing ko nagbakho nga dili kaya nga isurender ka

Wala ka man unta'y gibug-aton ning akong kinabuhi

Apan sa dihang nakauban ka, natugkan man ako sa tim-os nga pagbati

Gibaliwala ko man unta ikaw sa sinugdanan

Apan karun diay ikaw naman ang nagtingkagol ning akong dughan

Wala ka na ba diay mahinumdom pa kanako?

Wala mo ba diay hatagi ug pagtagad nga pagbati ko alang kanimo nahimugso?

Karun, wala ka na nga mahinabi ko

Wala ka na nga muhatag ug pahiyom ug kalipay ning dughan ko

Gikalimtan mo na ba diay ako?

Kay wala mo na man ako hatagi nianang pagtagad mo

Nabatyagan ko karun nga imo akong gikalimtan diha sa panumduman mo

Kay wala ka na man gayod magpakabana pa kanako

Gikalimtan mo na ba diay ako?

Kamatuoran nga lisod madawat ning kasing-kasing ko

Kay nakat-on na man unta ako sa pagmahal kanimo

Ug kanimo ko na lamang mabati ang kalipay ning dughan ko

Gikalimtan mo na ba diay ako?

Haw-ang na gayod kining kinabuhi ko

Ikauban ko na lamang ikaw sa akong mga damgo

Kay tataw na kaayo nga ako diay gikalimtan mo.

IKAW ANG AKONG KASANDIGAN

IKAW ANG AKONG KASANDIGAN

by Suzeth Mayormita Angana

Ikaw ang akong kasandigan

Sa panahon nga tanan

Ikaw ang akong kasandigan

Sa panahon sa akong kalisdanan

Ikaw ang akong kasandigan

Kun mangahanaw man kanako ang tanan

Ikaw ang akong kasandigan

Ning dughan kong nagmasulub-on ug samaran

Sa panahon sa tumang kasakitan

Anaa ka nga akong kasandigan

Anaa ka nga musapnay ning nagmaluya kong balatian

Anaa ka nga kasugiran ug akong kasumbungan

Sa panahon nga anaa ako sa lawod sa kasubo

Ikaw lamang ang makahupay ning dughan ko

Sa panahon sa akong mga pagbakho

Anaa ka nga muhapuhap sa akong tangkugo

Sa mga bulawanon mong mga tambag

Ang paglaom sa kinabuhi akong nahibalag

Mabatyagan ko man usahay ang kalaay

Apan anaa ka nga mupasig-uli ning akong kalipay

Anaa ka nga mutukag sa kinabuhi kong nag-alihid

Sa kanunay giubanan mo ako sa kinabuhi nga nagligid

Muhasmag man kanako ang kasakitan nga binaid

Kining tanang kakulian kong naangkon kanimo ko lamang masugid

Ikaw ang nagahatag ug bulok ning akong kinabuhi

Kay paglaom ko wa matakilpo ni mabali

Kay anaa ka man nga kasandigan ning gikapoy kong balatian

Anaa ka nga kaduolan panahon sa kahigwaos ug kasakitan

Nagtapun-og daw sama sa mga bato

Ang gidaghanon sa mga problema nga mihasmag kanako

Nabug-atan na kining akong dughan

Apan mapasalamaton ako nga kanunay mo akong giubanan

Gisalo mo ang kaugalingon ko nga napuno sa pagmulo

Giduyogan mo ako panahon sa kasubo

Giagak mo ako paingon sa matul-id nga dalan

Aron paglaom sa kinabuhi akong mapalgan

Gitultulan mo ako nga makita ang kahayag

Kay kaniadto kinabuhi ko nagusbat ug nagkatag

Kaniadto nag-alirong kanako ang kadulom sa kinabuhi

Nga nakapaluya kanako aron nga magpakabuhi

Gibitad mo ako aron makalingkawas ako sa kangitngit

Aron mabati ko ang kalipay gikan sa langit

Nabuhi ang nagkaawop kong paglaom

Kay ikaw kanako kanunay nagpahinumdom

Nga dinhi niining kalibutana

Adunay kasulbaran ang tanan tang mga problema

Tanang pag-antos ug kasakitan

Adunay utlanan ug katapusan

Gipasig-uli mo ang kamaya ning kinabuhi ko

Tungod sa tabang ug pagpangga mo

Anaa ka nga kasandigan panahon sa kahaw-ang

Anaa ka nga kasandigan bisan pagsulay sa unahan nagaatang

Dili masukod ni maihap ang kahigayonan

Nga ako imong giayudahan ug gitabangan

Linibuan ka pagpasalamat ang akong ipabati kanimo

Kay sa kinabuhi ikaw ang kasandigan ko

Kun Katudluan Ko Pa Lang ang Kasing-kasing Mo

-->

Kun Katudluan Ko Pa Lang ang Kasing-kasing Mo

by Suzeth Mayormita Angana

Ikaw ang binuhat nga akong gihigugma

Ikaw lamang ang sulod ning akong huna-huna

Ikaw ang tanan alang kanako

Apan gugma mo, sayod akong dili kana ma ako

Sakit dawaton ang gibukhad nga kamatuoran

Nga ikaw gibati ug gugma sa uban

Saksi ako sa imong mga mata

Nga kaniya ikaw may dakong paghigugma

Makita nako sa imong panagway

Nga siya ang giila mong kalipay

Mapasigarbuhon kang misugid nga gihigugma mo siya

Sa akong nadunggan, dughan ko baling sakita

Gipamulong mo pa nga kasing-kasing mo adto lang mupitik kaniya

Ug pagbati ko kanimo wala mo na gayod makita

Kun katudluan ko pa lang ang kasing-kasing mo

Tudluan ko kana aron ako ang higugmaon mo

Kun katudluan ko pa lang ang kasing-kasing mo

Hangyoon ko nga ako na lamang unta ang panggaon mo

Apan wa ako'y mahimo kay dili man kana katudluan

Kay ang kasing-kasing adunay kaugalingong prinsipyo ug baruganan

Sa matag takna nga mabati ko nga malipayon ka sa iyang kiliran

Mag-aginod sa kahapdos kining akong balatian

Kay ang paghigugma mo sa uban

Mao ang pagkapukan ug pagkasamad ning akong dughan

Hinay-hinay nga muligdas ang mga lugas ning luha

Kun ikaw ug sa maong binuhat akong makita

Kay sayod ako nga sa inyong panagkuyog

Pagbati ninyong duha nagkaduyog

Sama ra nga giambakan ang akong dughan

Niaanang nagtapok nga mga bato sa kadalanan

Kay iyang kamot imo mang gigunitan

Ug gibutang mo kini sa imong dughan

Akong namatikdan nga gipabati mo kaniya

Nga siya lamang ang gipangga mo ug gihigugma

Gipakita mo usab kaniya ang imong pagkamatinud-anon

Kay sa paghigugma dili ka man maluibon

Pagkaanindot baya kun ako ang anaa sa iyang dapit

Aron unta dili ko mabatyagan kining maong mga kasakit

Kasing-kasing ko naluya na ug nagping-it

Kay sa imong dughan siya man ang kanunay nga gisampit

Gihandom ko sa makadaghan nga ako ang higugmaon mo

Gipangandoy ko nga pagpangga mo maangkon ko

Apan akong nadawat kanunay ang dakong insulto

Kay dili ako ug siya man diay ang gihigugma mo pag-ayo

Usa ka dakong kapakyasan ug kapildihan sa gugma

Kay siya alang kanimo, ug ikaw alang kaniya

Kun katudluan ko pa lang ang kasing-kasing mo

Sayod ako nga ako ang pilion ug higugmaon mo

Apan pakyas man ako nga ma ako ka

Kay gugma ug pagbati ko kanimo wa mo na panumbalinga

Ang akong presensiya imo mang gibaliwala

Kay dili man ikaw ug ako ang gitakda

Kun katudluan ko pa lang ang kasing-kasing mo

Ikaw ug ako ang maghigugmaay

Apan imposible pa kining mahitabo

Kay diay siya man ang bugtong mong kalipay

PANAGBANGI SA MANAGTI-AYON

PANAGBANGI SA MANAGTI-AYON

by Suzeth Mayormita Angana

Lalaki: Oh akong Inday, nganong nagusbat man kanang imong dagway? May nabuhat ba ako nga nakapapas sa imong kalipay? Tan-awa ang atong balay, nagkatag man kining mga butang ug hinayhay. Ug gani, wala ko na mabatyagan nga aduna kay hustong pag-atiman sa gingbuhaton ning atong panimalay, kay diay ikaw ug sa atong silingan kanunay mang nag-estoryahanay ug naghinung-hungay.

Babaye: Kasakit ba nianang mga gipamulong mo. Wa mo ba diay makita ang pag-amuma ug pagtagad ko kaninyo? Sa sayong kabuntagon, mudali-dali ako pagbangon, arun kamo makakaon, nagluto sa mga kalan-on aron ikaw ug atong mga anak dili gutomon. Sa ingon niana ka sayon, mao kana ang isudya mo ngari kanako? Huh! Daan pa ko, mao dayon kana ang imong maistorya kay nakadimdim ka man diay ug bahal nga tuba.

Lalaki: Wa na! Gipasanginlan mo na pud ako. Wa ako maghubog-hubog kay gihatagan ko ug dakong bili ang trabaho. Nagkugi ako alang kanimo, mikayod ako aron mahatagan kamo sa pang-inadlaw-adlaw nga panginahanglanon; ug aron sa ingon makatagamtam ang atong mga anak ug makabaton ug mahayag nga kaugmaon. Mao ba kana ang ibalos mo kanako, ang masakit nga mga pulong nga imong gipunting kanako?

Babaye: Wa ka lang makasabot... Kay dayon ka man ug bagutbot. Timan-i nga kanimo, wa ako mahimuot kay sa imong mga barkada ikaw mihapit ug pakigsandurot.

Lalaki: Gituis mo man dayon ang gipanag-istoryahan tang duha, nga unta gihisgutan ta kabahin lang man sa atong pamilya. Nangita ka man ug bikil kay pasagad ka man lang ug sugid kanang imong mga pasangil.

Babaye: Kahait ba nianang mga pulong mo; sukwahi na man gayod kana niadtong mga saad mo. Kaniadto, sa bag-o pa tang nagminyo, pinalangga mo ako kaayo. Apan karon, sagad ko nang mabati nga pasakitan mo ako nianang mga pulong mo. Dakong bakak kadtong gipanumpaan ta, kay karon kasakit man ang gipatagamtam mo.

Lalaki: Kalayo na gud nimo ug gihisgutan. Nagsipok na gayod kining akong ulo sa imong mga pinulongan. Ayaw ako ingna nga ako kanimo nagbakak sa akong mga panumpa; kay pagmatuod ko kanimo sa akong saad dili makalabaw sa nahimo kong kalapasan ug sala. Ayaw isipa nga kadtong mga giluwat ko kaniadto pulos ra kadto ulo-ulo, kay gani gihigugma ko man ikaw pag-ayo lakip ang mga anak ko.

Babaye: Dong, pasayloa ako, kay wa ako makahatag sa akong pasensiya diha kanimo, niulbo man gud dayon ang akong kalagot sa dihang mga pagbagulbol imong nasulti sa dihang ikaw ganiha miabot.

Lalaki: Oh! Akong Inday, pasayloa usab ako sa nasugid ko kanimo, sa tinuod lang nakainom bitaw ako ug usa ka baso nga bahal mao kadtong miinit ang akong dunggan ug ulo, hinungdan nga gisapot ako. Apan karon, nahuwasan na ako, hinaot nga mapasaylo mo ako.

Babaye: Hingsabtan ko ikaw... andam ako kanunay nga sa imong pagpasabot maminaw. Dili man gayod kalikayan nga kita magkasumpaki, kay mao man kini mupalig-on sa nagkaduyog tang pagbati.

Lalaki: Husto ka sa imong giingon, isip managti-ayon, paningkamutan tang panag-uban ta magmalig-on. Dili kita magpadala sa mga pagsulay aron ang atong panimalay manimuyo binukharan sa pagsinabtanay ug kalipay. Balikon ta pagsugid ang atong saad ug panumpa sa usag-usa...

Lalaki ug Babaye: Kasakit ug kalipay yayungan tang duha.