Tubod Sa Mga Luha

TUBOD SA MGA LUHA

Samdan ba kanang kasing-kasing mo?

Luhaan ba kanang dughan mo?

Tubod sa mga luha ang mudagayday

Kun ikaw hinikawan sa kalipay

Ang tubod sa mga luha imong masinati

Kun ikaw sa tumang kapakyasan gipabati

Bunga kini kay luhaan ug samaran ang dughan

Kay gilangkupan man sa mapait ug masakit nga kasinatian

Mahimong malumos ang imong dughan

Tungod sa nagtubod nga luha nga imong maagian

Dili sayon pamation kun ikaw makaangkon sa maong pagbati

Kay dili ta hingsayran kun may paghubas ba kini

Naglangkob sa kakuyaw ang imong balatian

Kun tubod sa mga luha imong matagamtaman

Lawom daw samad imong pagaantoson

Kun tubod sa mga luha imong maangkon

Tubod sa mga luha – hulagway sa hilabihang kahapdos sa kasing-kasing

Kay dagkuang mga pag-antos nagpadayon pagpanalingsing

Padayon sa pagpanalingsing ang mga tipaka sa kasakit

Kay kini gibisi-bisan man sa tubod sa mga luha nga mapait

Tubod sa mga luha imong masinatian kay ikaw biniyaan

Gibiyaan ug gitalikdan ka sa binuhat nga imong gikauban

Ang iyang pagkahanaw ug pagbiya kanimo

Maoy hinungdan nga tubod sa mga luha nakab-ot mo

Dili sayon nga tipigan mo kini kanunay

Kay malisod mo gayod nga mabatunan ang matuod nga kalipay

Tubod sa mga luha, lisod nga muhubas ug mahanaw

Kun dili mo kalimtan ang masakit nga kasinatian nga nabahaw

Malisod ang pag-ikyas ning tubod sa mga luha

Kay kini aduna may mga gapos nga hinulma

Mga gapos nga mugunit kanimo ug maayo

Aron sa pagbaton sa kaisog pag-ikyas ikaw dili mahaylo

Mulapad ang wanang ning tubod sa mga luha

Kun ikaw sa ubang binuhat ikaw gipabati sa mga pagsudya

Ug sa ilang pagsudya kanimo daw kasing-kasing mo gidagmalan

Kay dili gayod sayon nga tagamtamon ang masakit nga kasinatian

Ang tubod sa mga luha pagkalisod kabyahon

Kay niini ang kasing-kasing mo sa mga luha pagapun-on

Magkadaghan ug magkataas ang gihabugon sa maong tubod

Kun dughan mo sa pagbakho dili na makasugakod

Dili gayod sayon ang paghambin ning tubod sa mga luha

Kay kini sa kaalautan ug kasakit sa kinabuhi nagpakita

Kisod kaayong ikawas pahilayo niini

Kay gitakpan man ang lutsanan ug di na maabli

Ang tubod sa mga luha, mahimong mubitad kanimo

Ngadto sa tampulong sa kamingaw ug kasubo

Mutabon kini sa kinabuhi mong giuhaw sa kalipay

Kay ang pagbakho kanunay man kanimong nag-apong ug nagbantay

Kun anaa ka man karun sa tubod sa mga luha

Kun kasakit ug kahapdos sa kinabuhi kanimo nagpataliwala

Pahilayo nianang maong tubod

Kay kinabuhing luhaan ilado nga sum-od

Pangitaa ang ganghaan ning tubod sa mga luha

Arun kalipay sa kinabuhi imong masilip ni makita

Kay kun kanunay kang magpabilin diha sa imong nahimutangan karun

Malisod kaayong mabatyagan mo pa ang pagkamalipayon

GUGMA

GUGMA

by Suzeth Mayormita Angana

Gugma! Pagbati nga nagasukad sa atong dughan

Gugma! Pulong nga makapaayo sa samdan nga balatian

Gugma! Pagbati nga gihambin sa kadaghanan

Gugma! Butang nga dili ta takos nga malikayan

Sa pagsilang sa adlaw sa sayong kabuntagon

Mabati mo dayon ang kamaya ug kamalipayon

Kun ikaw nagbaton ug gugma diha sa imong kinabuhi

Kay ang gugma tinubdan sa hapsay nga mga pagbati

Sa pagpamuswak sa mga kabulakan sa kabaulan

Makahatag ka niini ug pagtagad ug kapuslanan

Kay ang kinabuhi nga may gugma makamaong mohatag ug gibug-aton

Bisan sa mga yanong butang ug sitwasyon

Gugma! Pulong nga mukulit sa matam-is tang pahiyom

Gugma! Butang nga mutusdik sa atong pagbati sama sa dagom

Malipayon ang kinabuhi kun anaa ang gugma

Nindot magpakabuhi sa kalibutan kun magbaton kita ug gugma

Malisod hubaron pinaagi sa mga pulong ang kahulugan sa gugma

Ang gugma adunay kaugalingong pamaagi ug takna

Ang gugma walay pugsanay ug walay balibaray

Kay ang gugma matuod kini, halangdon ug tiunay

Gugma! Pulong nga mugitik sa atong dughan

Apan ang gugma usahay muhatod kanato sa kaparutan

May mga binuhat nga sa gugma nagahilak ug nagbakho

Aduna say mga binuhat nga sa gugma nagmaya ug nagmalipayon kaayo

Dili patas ang nahiaguman sa matag binuhat kabahin sa gugma

Kay matag binuhat adunay kaugalingong sugilanon sa gugma nga hinulma na

Dili ikaw makaingon nga diha sa gugma kamaya perme imong maangkon

Timan-i nga diha sa gugma posible nga mag-abot imong luha ug sip-on

Kun ikaw gusto nga higugmaon, batuni ang matuod nga gugma

Kun ikaw sa gihapon gisuklian sa kasakit bisan sa gugma mo kaniya

Ayaw pagpakawa sa paglaom kay ang gugma mainantuson

Ayaw pagsurender kun ikaw giluiban sa usa ka maluibon

Hilak kutob sa imong mahimo kun ikaw masakitan

Pamaagi kini aron mahaw-as ang tanan nga pagbati nga angay kalimtan

Ang gugma sama sa bulan, usahay mabatunan mo ang tumang kahayag

Sama sa panahon sa tingtakdol, diin maayo ang imong pamatyag

Apan ang gugma usahay anaa sa kadulom

Nga diha sa kadulom, pagbati mo usab nagping-it ug nagdagtom

Huna-hunaa sa makadaghan nga diha sa gugma dili tanan lami

Kay diha sa gugma usahay anaa ang pagbiya ug paghikli

Matngoni usab ang kamatuoran nga tanan pwede makabaton ug gugma

Apan dili tanan adunay nagmahal ug nahigugma

Nindot ang pagpakabuhi kun sa pagmahal kanimo may musukli

Apan kun way mutagad sa imong gugma kini mahimong walay bili

Diha sa gugma, anaa kanunay ang nagpahipi nga misteryo

Nga usahay gugma dili matugkad sa kapintas sa usa ka tawo

Gugma! Butang nga sama sa espada nga duhay sulab

Nga sa dughan ta mahimong muhalabas ug mugalab

Gugma butang nga makapasamad sa atong dughan

Apan butang usab kini nga mupaalim sa samad sa atong balatian

Lawom daw kadagatan ang pagtugkad sa kahulugan sa gugma

Kay kini may kaugalingong gahom nga gipanag-iya

Gamhanan ang gugma nga mahimo niining pagalumpagon

Ang hataas nga mga bungtod sa kaligut-got ug pagkamasulob-on

Gamhanan ang gugma kay may katakos kini arun

Lamyon ang mga tipaka sa masakit nga kagahapon

Gugma nagtakuban ug naghabol kini ug talinghaga

Nga usahay dili hingsabtan sa atong mga huna-huna

Gugma! Pagakalisod mong sabton

Gugma! Pagkalisod mong tugkarun

Pagbantay sa kanunay kay tingali maigo ka sa pana sa gugma

Andama ang imong kaugalingon kay kini yano ra nga muabot sa imuha

Gugma! Usisaha kay tingali nagpahipi na kini sa imong dughan

Gugma! Paabota ug hulata ug kini dili mo gayod kabalibaran.

Tam-is Ba Ang Paghigugma?

TAM-IS BA ANG PAGHIGUGMA?

by Suzeth Mayormita Angana

Alang sa mga binuhat nga gibati ug gugma

Tam-is alang kanila ang paghigugma

Nasayod ba kamo kun nakaingun ako ana

Kay usa ako ka binuhat nga anaa ang paghigugma

Namugna ang matuod nga kalipay tungod sa gugma

Nabatunan nato ang kalinaw tungod sa gugma

Ang tanang maayong butang nga atong nahiagoman

Bunga kini sa gugma; kay ang pagkamaayo gugma man

Daghang mga binuhat ang gibati ug gugma

Apan dili tanang tawhanong paghigugma balaan

Dili tanang nailhan tang nahigugma

Ang pagluib kanunay gibalibaran

Matawag tang tam-is ang paghigugma

Kun ang duha ka binuhat matinud-anon nga nagminahalay sa usag-usa

Kun anaa ang pagtoo ug pagsalig

Anaa ang talagsaong paghigugma nga angayan sa pagdayeg

Daghan sa mga binuhat nga nagmahal

Apan nasagulan ug ginatawag tag karibal

Usa kini ka babag ug butang

Nga sa paghigugma mapait tagamtamon ang kahimtang

Tam-is ang paghigugma kun kini wa magsukad sa kahakog

Tam-is ang paghigugm kun kini walay laing kailog

Tam-is ang paghigugma kun ang duha ka binuhat

Sa usag-usa ra nahigugma ug nagahulat

Tam-is ang paghigugma kun kini sa sala limpyo

Tam-is ang paghigugma kun kini adunay maayong tumong ug tuyo

Tam-is ang paghigugma kun kini adunay paghuna-huna sa uban

Kay ang matuod nga paghigugma dili man hikawan

Maangkon mo lang ang katam-is sa paghigugma

Kun ikaw naghambin ug limpyo nga konsensiya

Ang katam-is sa paghigugma halangdon

Ug talagsa lamang niini ang nakaangkon.

Luha

-->

LUHA

by Suzeth ayormita Angana

Luha, natagamtaman mo na ba?

May luha ba nga midaligdig sa imong mga mata?

Luha, bunga ba kini sa pagmahay?

Luha, bunga ba kini sa kalipay?

Ang luha nagsimbolo sa usa ka yano nga butang

Apan kun maangkon mo kini, kasing-kasing mo mura ug matangtang

Ang matag lugas sa atong mga luha

Adunay nagkalain-lain nga kahulugan nga gipakita

Kun biniyaan ka, mutulo gayod ang imong luha

Kun sinalikway ka, magtubod usab ang imong luha

Sa panan-aw sa kadaghanan

Ang luha bunga gayod sa masakit nga kasinatian

Mahimong pugngan mo ang pagtulo sa imong mga luha diha sa imong mga mata

Diha sa imong mga pagbakho, mahimo mong itulon ang imong mga luha

Apan ang luha simbolo gayod kini sa tumang kasakitan

Bisan pugngan mo pa kini ug dili ipakita sa uban

Ikaw nakabaton ug luha tungod kay samdan ang imong balatian

Ikaw naghambin ug luha kay gugma mo gisayangan

May luha nga miagay sa imong mga mata tungod sa tumang kaguol

May luha nga miipsot sa imong mga mata kay kasing2x nagbagulbol

Luyo sa mga luha nga imong masinati

Aduna kini kalipay nga sa unahan nagpahipi

Maagian mo ang pagtulo sa imong mga luha

Aron kalipay sa unahan masinatian mo ug makita

Walay makalikay niining maong bantugan nga butang

Nga gitawag ug luha, kay sa mata mo kanunay kining magpaatbang

Ilabi na gayod ug makino ang nahikatulog mong kahiubos

Ug mas labaw pa kun kasing-kasing mo sa kasakit nagaantos

Luha, mutulo kun pakyas ka sa paghigugma

Luha, mutulo kun kanimo wala gayoy mualima

Luha, muagay kun kasing-kasing mo nagmaluya na

Luha, muagay kun luhaan ang imong kasing-kasing

Ang luha gikan sa kasing-kasing nga migawas sa atong mga mata

Arun mapakita niini nga pag-antos sa kasing2x haska na gayong sakita

Dili sayon kapugngan ang mga luha

Kay kini muipsot lamang sa bisan kanus-a nga takna

May pipila ka mga binuhat nga sa luha kanunay nakasinati

Kay gidasmagan sa mga kasakit nga naglagiti

Sakit kaayo pamation kun luha imong maangkon

Kay mapapas ug mahanaw gayod ang imong pagkamalipayon

May ginatawag nga luha sa kalipay

Apan mas kasagarang mahitabo ang luha sa pagmahay

Ampingi kanunay ang imong kaugalingon

Arun luha dili mo kanunay maangkon

Ampingi gayod kanunay ilabi na ang imong dughan

Arun sa luha ikaw dili mahuluman

Hapdos ang imong dughan kun may luha diha sa imong mga mata

Sakit iginhawa kun luha nanggunit na diha sa pilok sa imong mga mata

Nagbakho ug nagluha ka ba karung mga higayona?

May luha ba nga nagpahipi karun diha sa imong mga mata?

Ayaw kana pugngi, patulua kana

Arun mabatyagan mo ang kalipay sa umaabot nga mga ugma

Kun nagtulo ang mga luha mo karun

Kay sa kapakyasan ug kaalautan ikaw naulipon

Paniguroha nga ugma damlag ug sa umaabot nga mga panahon

Luha dili mo na kanunay masinatian ug maangkon.

Mabugnaw Nga Kagabhion

MABUGNAW NGA KAGABHION

by Suzeth Mayormita Angana

Sa takna nga musalop na ang adlaw ngadto sa kasadpan

Ug mutikyop na ang kahayag ug sa kangitngit gipulihan

Ug lamyon niini ang nagpahipi nga kahayag

Aron sa ingun matagbo ang umaabot nga laing buntag

Hinay-hinay nga muhuyop ang mabugnaw nga hangin

Nagpamatuod nga sa kainit kini naghingilin

Muhinay-hinay usab pagkanaog ang mga taloto ngadto sa yuta

Kay inig salop sa adlaw sa ilang pagrespeto sa kahitaas-an mupakita

Maglumbaanay pagbatog ang nagkadaiyang kalanggaman

Ngadto sa mabagang sanga sa kakahuyan

Ug madungog ang nagkaguliyang nga tingog sa ihalas nga mga mananap

Kay ang kahayag inanay nga sa kangitngit gihikap

Padayon ang paghuyop sa makapanugnaw nga hangin

Ug ang kabugnaw sa kaunuran magpabilin

Higupon niini ang kainit nga gibuga sa adlaw

Kay ang kainit sa adlaw sa kagabhion dili na mupatim-aw

Mao kini ang takna sa mabugnaw nga kagabhion

Nga mupakiyugpos sa tagsa-tagsa tang mga bukton

Ang kabugnaw sa kagabhion nga musuhop sa atong kalawasan

Nga mupatumba kanato sa atong higdaanan

Kabugnaw sa kagabhion kay mihuyop man ang hangin gikan sa amihanan

Mabugnaw nga kagabhion kay ang sinag sa adlaw dili na makit-an

Diha daplin sa nagdaguok nga tubig sa kasapaan

Ang kabugnaw sa kagabhion imo gayong mabatyagan

Kay diha anaa ang lapyo nga mga dahon

Nga nag-ugom sa mga yamog bunga sa mabugnaw nga kagabhion

Nagtabisay ang mga yamog tungod sa kabugnaw

Kabugnaw sa kagabhion nga nagpangamay sa katugnaw

Mikuyugpos ug mikolo ang mga dahon sa tanaman

Kay sa kabugnaw sa kagabhion kini gihabulan

Gibukotan sa kabugnaw ang tibook palibot

Kay ang kainit sa kalit lamang nahanaw ug nahurot

Mihupas ang inadlaw nga kainit sa katubigan

Kay mikanaog man ang kabugnaw nga hilabihan

Kabugnaw nga makapakurog sa atong mga tuhod

Kabugnaw daw sama diha sa mga tubod

Kabugnaw nga mukusi sa atong mga panit

Kabugnaw nga sa tumang katugnaw mihagit

Kabugnaw nga muhapuhap sa atong mga aping

Kabugnaw sa kagabhion nga kanato makapaigking

Kabugnaw nga mubira kanato sa atong pagtukaw

Kabugnaw nga mupalubog sa atong mga panan-aw

Kay danihon man niini ang imong mga mata arum mutikyop

Kay ang haring adlaw sa hingpit misalop

Mukanaog ang kabugnaw ngadto sa kayutaan

Gikan sa hataas nga kapanganuran

Ug lukpon niini ang tagsa tagsa tang tugkaran

Arun kabugnaw sa kagabhion atong matagamtaman

Kabugnaw sa kagabhion lisod kaayong huypon

Kabugnaw sa kagabhion dili nalim antoson

Ilabi na ug walay musandig diha sa imong mga bukton

Ug ilabi na gayod kun mag inusa ra ikaw panahon sa kagabhion

Pagkaanindot kun ikaw may kauban

Sa panahon sa mabugnaw nga kagabhion

Arun dili ka sa kabugnaw maurupan

Kay ang mabugnaw nga kagabhion, kabugnaw nga dili masayon sayon

Balod Sa Yuta

BALOD SA YUTA

May balod ba diha sa yuta?

May balod, apan kini usahay dili ta makita

Mga balod nga nagkahulugan sa malig-on nga kamatuoran

Nga andam kini nga kinabuhi sa tawo pagabukotan

Mga balod nga muhampak matag karun ug unya

Mga balod nga sa kalibutan ta nagpataliwala

May mga panahon nga linaw pa sa lana ang atong mabatyagan

Apan muabot gayod ang mga balod nga muuyog sa atong kapalaran

Ang yuta nagsimbolo sa mamala

Apan may mga balod kini nga gitagana

Dinhi sa yuta, mabatian ta ang mga balod sa kasakit

Anaa gayod ang mga balod nga nagpaninggit

Anaa ang makusog nga huyop sa mga pagsulay

Nga magtukmod arun muulbo ang mga balod luyo sa atong kalipay

Mga balod nga kanato mahimong mulumos

Mga balod nga nagkahulugan sa mga kasakit ug mga pag-antos

Diha sa lapyahan sa tagsa-tagsa tang kinabuhi

Anaa ang mga balod dinhi sa yuta nga nagpungasi

Daw sama sa mga balas dinha sa kabaybayonan

Ang mga balod sa yuta nga mahimo tang masinatian

Nga kini dili maihap sa atong mga tudlo

Nga kapila kini musugat ug muhasmag ngari kanato

Wala kini gipili nga panahon kun kanus-a kini mupatim-aw

Kay usahay sa mga kaisog ta mutunaw

Mga balod sa yuta nga muhatod kanato sa mahait nga kabatuan

Nga mahimong musamad sa atong mga balatian

Diha sa lawod ning atong kinabuhi

Anaa ang mga balod nga kanunay nagpahipi

Mga balod nga manggula dinhi sa yuta

Mga balod nga usahay dili mu gayod matugkad ug masuta

Sa bisan asang suok ning gipuy-an tang yuta

Anaa nag-apong nga mga balod arun kanato muhadla

Mga balod nga mahimong mutumpag sa atong kalig-on

Mga balod nga mupapas sa atong pagkamalipayon

Ang mga balod sa yuta mas hait pa kay sa mga balod sa kadagatan

Kay ang balod sa yuta, mga balod nga naghulagway sa mga pagsulay ug kasakitan

Mga balod nga mubanlas panahon sa atong kahigwaos

Mga balod nga musudya sa panahon sa atong mga pag-antos

Mga balod nga muyubit kun sa kusog kita nawad-an

Ug ang pagtoo ta sa pagka way paglaum gipulihan

Balod sa yuta, mga balod nga dili kalikayan

Mga balod nga dili ta gayod kataguan ug kabalibaran

Ang kinabuhi ta, gikaluhaan ng daan

Ning mga balod sa yuta nga nag-atang kanato sa unahan

Mga balod nga musulay sa atong kusog

Arun sa ingun makamao kitang mubarog

Matumba man kita sa paghampas sa mga balod

Apan paningkamutan ta nga kita makasugakod

Kay ang tanang balod dinhi sa yuta nga atong maangkon

Kini may katapusan ug mahanaw lamang kini sa dayon

Kun anaa ang mga sulog nga mutuok kanato

Anaa usab ang kalinaw nga maangkon ta pinaagi sa pagpangaliyupo

Gamhanan ang mga balod nga anaa sa yuta

Apan mas gamhanan kadtong binuhat nga niini nagmugna

Batuni kanunay ang pagsalig sa kahitas-an

Kay Siya lamang ang may gahom nga mubuntog niining tanan

Bulahan kadtong adunay pagsalig ug pagtoo

Pagsalig nga way pagkabugnaw sama sa kalayo

Magmadaugon kadtong nagbaton niining hiyas sa kinabuhi

Kun mga balod sa yuta dili lamang gayod hatagan ug dakong bili.

Gikalimtan Mo Na Ba Diay Ako?

-->

Gikalimtan Mo Na Ba Diay Ako?

by Suzeth Mayormita Angana

Ang kinabuhi ko karun nahulom sa kamingaw

Ang pagbati ko karun walay padulngan ug naglatagaw

Kanunay akong naghandom sa mga higayon nga kita nagkauban

Ang pagpunay ug paghandom kanimo nagbunga sa tumang kasakitan

Pilit kong gipaningkamutan nga kalimtan ka

Kay sayod ako nga diha kanimo, ako wala mo handuma

Sakit hangpon ang kamatuoran nga ako walay gibug-aton diha sa imong dughan

Sakit huna-hunaon nga ako diay imo namang gikalimtan

Ang atong hamubo nga panag-uban, wala mo hatagi ug bili

Kay sayod man ako nga sa paghigugma dili ako ang imong gipili

Wala ako'y igong katungod arun angkonon ka

Ni gihuptang katungod arun sa pagdani sa uban mapugngan ka

Wala ako'y katungod pagdumala diha kanimo

Kay dili man ako ang tag-iya nianang kasing-kasing mo

Gusto ko man unta nga ikauban ka pag-usab

Apan sayod ako magpunay ka man lamang ug gahin sa imong pagbalibad

Matag buka ning akong mga mata sa sayong kabuntagon

Kanunay kining nagpangita ug naghandom sa imong kaugalingon

Apan unsaon ko man... nga ako diay gikalimtan mo na man

Unsaon ko man... nga ako diay walay luna ug kataguan diha sa imong dughan

Gidawat ko nga ubos lang ako ikumpara sa uban

Sayod ako nga uyamot lamang kining akong kapalaran

Kung hitsura ang pagabasihan, mabutang gayod ako sa kinaulahian

Ug ako dili makahatag kanimo sa mga kabtangan

Wala ako'y ikapasigarbo ug ikagasa kanimo

Gawas niining tim-os ug matuod nga pagbati ug pagpangga ko

Kalipay ko nga mahibaw-an mo nga ako may pagbati unta kanimo

Apan padayon ka mang mipalayo dinhi ning kinabuhi ko

Dili ko na gani mapakita kanimo kining dako kong paghigugma

Kay dili ko naman ikaw makita ni makauban pa

Gipaningkamutan ko man unta nga ilubong ko ikaw sa kalimot

Apan napupo ko man hinuon nga dughan ko wala mahimuot

Matod ning huna-huna ko, kalimtan ka na

Apan nakigtigi kining dughan ko nga padayon nga higugmaon ka

Huna-huna ko nagtiyabaw nga ibaliwala ka na

Apan kasing-kasing ko nagbakho nga dili kaya nga isurender ka

Wala ka man unta'y gibug-aton ning akong kinabuhi

Apan sa dihang nakauban ka, natugkan man ako sa tim-os nga pagbati

Gibaliwala ko man unta ikaw sa sinugdanan

Apan karun diay ikaw naman ang nagtingkagol ning akong dughan

Wala ka na ba diay mahinumdom pa kanako?

Wala mo ba diay hatagi ug pagtagad nga pagbati ko alang kanimo nahimugso?

Karun, wala ka na nga mahinabi ko

Wala ka na nga muhatag ug pahiyom ug kalipay ning dughan ko

Gikalimtan mo na ba diay ako?

Kay wala mo na man ako hatagi nianang pagtagad mo

Nabatyagan ko karun nga imo akong gikalimtan diha sa panumduman mo

Kay wala ka na man gayod magpakabana pa kanako

Gikalimtan mo na ba diay ako?

Kamatuoran nga lisod madawat ning kasing-kasing ko

Kay nakat-on na man unta ako sa pagmahal kanimo

Ug kanimo ko na lamang mabati ang kalipay ning dughan ko

Gikalimtan mo na ba diay ako?

Haw-ang na gayod kining kinabuhi ko

Ikauban ko na lamang ikaw sa akong mga damgo

Kay tataw na kaayo nga ako diay gikalimtan mo.