Abog Sa Dagat

ABOG SA DAGAT

May abog ba nga anaa sa dagat?

May abog ba nga nag-utaw utaw sa tubig nga maparat?

Ang kadagatan napuno sa mga katubigan

Nga mahimong sa mga abog masagulan

Mga abog nga mukutil ngadto sa katubigan

Mga abog nga magtimpasaw diha sa kalawran

Arun ang katin-aw sa dagat mapulihan sa kadulom

Mapulihan sa kangiob, kalubog ug kadagtom

May kagawasan ang mga abog nga mutugpa ngadto sa kadagatan

Nga kini pagahuypon sa makusog nga hangin arun dad-on ngadto sa kabaybayonan

Agakon kini sa panahon diha sa dakong unos

Arun ngadto sa tampulong kini ihandos

Diha sa kadagatan anaa ang mapintas nga daguok sa mga balod

Anaa ang naglangtanay nga mga hugyaw sa katubigan

Mga sulog nga sa piliw nagpanuklod

Mga pinilo nga katubigan nga naggagikan sa kalawran

Mabangis ang mga balod diha sa kadagatan

Apan bisan sa kabangis niini, sa abog kini dili makalingkawas

Halos mapuno ang kalibutan sa mga katubigan

Apan sa mga abog kini dili makabanlas

May panahon nga mulinaw gayod ang kadagatan

Apan sa ibabaw niini anaa ang mga abog nagduyan-duyan

Muabot ang higayon nga muhuyop ang naghaguros nga hangin

Ug sa malinaw nga kadagatan kini naghingilin

Ug sa kalit mubanos ang nag-akal-akal nga bunok sa mga balod

Ug diha niini nagpauraray ang mga abog daw sama sa gapnod

Suyupon sa mga balod ang abog

Ug sa tubig kini gayod musambog

Ang dagat naghulagway sa kinabuhi sa katawhan

Ang abog nagsimbolo sa mga pagsulay nga atong maagian

Nga sa bisan unsang takna ug higayon

Ang mga pagsulay sa kinabuhi andam arun kita sulungon

Mga abog nga mupuling sa atong mga mata

Arun maglisod kita nga makita ang padulngan ta

Mga abog nga mukuyanap nganhi kanato

Arun musurang-surang sa kinabuhi ta nga hinlo

Naglumpanat ug naglumbana ang mga abog

Arun katin-aw sa kinabuhi ta hulipan sa kalubog

Mga abog nga mudalikyat ug bugtaw sa atong kinabuhi

Aron pagkatawo ug baruganan ta sa hinay-hinay mangligti

Mga abog sa kinabuhi malisod gayod malikayan

Kay kini napatik ug nahulma na man sa kapalaran

Mga abog nga mulukop sa kinabuhi sa mga tawo

Arun kaharuhay sa kinabuhi dili masungko

Bisan nagbaton ug kaisog ang usa ka tawo

Daw sama kaisog sa mga balod nga nagkamang ngadto sa lapyahan sa kadagatan

Apan ang maong kaisog dali-daling mabuntog

Kay napuling man sa hambaw sa mga abog

Pagkapintas sa mga abog nga mutugkad diha sa dagat

Daw sama niana kakuyaw kun ang mga abog sa kinabuhi mugusbat

Mga abog, gaan kun imong tan-awun

Apan mabug-at kini kun kinabuhi mo pagabugnuon

Abog nga anaa sa dagat malisod kaayong matunaw

Diha usab sa kinabuhi sa tawo, may abog nga lisod mahanaw

Mga abog nga naghulagway sa mga lamas sa kinabuhi

Kay ang kinabuhing adunay lamas, kinabuhi nga adunay dakong bili