Dag-um sa Paghigugma

DAG-UM SA PAGHIGUGMA

Dag-um sa paghigugma, mga dag-um sa kasingkasing nga makapaluya

Mga dag-um nga mutabon sa atong mga mata

Arun ang kamatuoran dili ta makita

Nga muresulta sa nakalas nga paghigugma

Mga dag-um nga nag-ugom ug kasinatian nga nagdagtom

Dag-um nga nagpakita nga paghigugma wala nay paglaum

Mga dag-um nga mulubog sa matam-is nga paghigugma

Arun duha ka binuhat nga nagminahalay bulagon sa usag-usa

Mga dag-um sa paghigugma nga makapatingala

Kay ut-uton niini ang nanalingsing nga paghigugma

Babag kini sa tanang pagmahal ug pagpangga

Kay ang dag-um sa paghigugma makuyaw ug malala

Diha ning atong paghigugma, adunay nagpahipi nga kabalaka

Adunay nagtakuban nga mga kahadlok ug pagduda

Kay gibukutan man sa nagtapun-og nga mga dag-um

Arun musulay sa pagminahalay nga malungtarun

Ang gugma nga mulungtad sa hataas nga panahon

Bukutan gayod sa nagbagang mga dag-um

Kini nahitabo arun masukod kun matuod ba ang paghigugma

Kay ang matuod nga paghigugma sulayon sa mga dag-um nga nagbaga

Ang dag-um sa paghigugma, mga kasakit nga masinatian

Mga kaligutgot, kabalaka ug kakulba diha sa dughan

Mga malaw-ay ug negatibong pagbati

Nga sa dughan sa matag binuhat dili gayod magpili

Ang mahigugma kusu-kusuon sa mga dag-um sa paghigugma

Arun sa paghigugma, mukabos ang pagsalig ug pag-amuma

Mga dag-um nga mugusbat sa nagdugtong nga relasyon

Arun kini pagagun-ubon ug pagapukanon

Mga dag-um nga naghulagway nga paghigugma maanugon

Mga dag-um nga muhasmag arun mawagtang ang pagkamalipayon

Mga dag-um nga mukudlit sa tumang kasakitan

Mga dag-um arun gugma matukmod sa kaparutan

Mga dag-um nga muhigop sa kalipay

Mga dag-um nga nagdala sa ulan sa mga pagmahay

Mga dag-um nga mupaambit sa nagpamahit nga kasakit

Kay mga dag-um man kini nga sa paghigugma mupatim-aw ug kalit

Mga dag-um nga nagdala sa makusog nga hulbaw sa kasakitan

Arun gub-on ang pagbati sa matag dughan

Tiltilan sa mga naghaguros nga dag-um ang paghigugma

Arun kasingkasing bation ug kabildi ug kaluya

Mga dag-um nga mukutlo ug mupupo sa pagbati nga malumo

Dag-um nga mupaulbo ug mupasilaob sa kasuko

Mga dag-um arun kalig-on sa paghigugma mabugto

Mga dag-um nga mukunsad arun kahigwaos sa dughan mahimugso

Kun mubunok na ang mga dag-um sa paghigugma

Nagpasumbingay kini nga paghigugma nagkahanaw na

Paghigugma ug pagbati sa dughan nagkabugnaw na

Relasyon sa usag-usa nagkalayo ug nagkawala na

Gingharian sa paghigugma mahugno

Kun kining maong mga dag-um tugutan sa dughan arun makigbugno

Tunokon ug mahait ang mga dag-um sa paghigugma

Nga mudulot ug makapasamad sa kasingkasing mo nga nag inusa ra

Mga dag-um sa paghigugma nga muhagit sa imong pagkamatinud-anon

Mga dag-um sa paghigugma nga mukusi sa pagbating mahinangpon

Makusganon ang mga dag-um sa paghigugma

Apan mulungtad hangtod sa kahangturan ang tim-os ug bulawanon nga paghigugma