Paghanduraw Sa Kagahapon

PAGHANDURAW SA KAGAHAPON

by Suzeth Mayormita Angana

Sa dihang wa na magkatakdo ang atong tagsa-tagsang balatian

Pilit kong gidawat ug gihakgum nga nagkabulag usab ang atong mga dalan

Ikaw karun nagmalipayon sa kiliran sa uban

Ug ako sa gihapon nagpabilin nga sa paghigugma may kagawasan

Naglatas ako sa kamingawan ning kinabuhi nga nag-inusa ra

Kay wala ka na man nga akong masampit ug makita

Mitabon ang kahilom ning akong kinabuhi

Kay diha kanimo ako wala na man hatagi ug bili

Daw sama ra nga kinabuhi ko

Sa dakong kamingawan nagpundo

Ug didto nahanduraw ko ang atong kagahapon

Nga ikaw ug ako nagsalo unta sa pagkamalipayon

Kalipay ko unta ang paghinumdum kanimo sa kanunay

Sa kasuod ug gisaw-an tang kalipay

Apan sama sa dagami diha sa kabaulan

Milawos na man diay ang paglaum nga kita magkauban

Gitugotan mo ang imong kaugalingon

Daw sama sa gapas nga sa hangin huypon

Ug ikaw gihuyop sa hangin pahilayo kanako

Pahilayo kanako nga maoy tugbang ning ako karung pagmulo

Kun makita ko ang nagsayaw-sayaw nga mga kabulakan

Niining halapad ug mingaw nga kaumahan

Mahinumduman ko nga ako kanhi nagmaya

Kay ikaw ug ako aduna may saad ug gugma nga gimugna

Naglangtanay kita niadtong mamingaw nga dapit

Ug ikaw sa akong mga kamot kanunay migunit

Ug tungod niadto, giisip ko nga ikaw ang kinabuhi ko

Ikaw ang gilauman nga makahatag sa tinuod nga kalipay ko

Giduaw ko pagbalik ang punuan sa kahoy

Kay didto gikulit ta ang mga saad alang sa usag-usa

Apan kini nahimong anugon ug makaluluoy

Kay pakyas and pagtuman sa maong mga panumpa

Gihimo lang ba diay kadtong maong panumpa arun pakyason?

Nga bisan ipatik pa kini sa bato

Wala na kini silbi ug nahimong anugon

Kay pakyas man kini human sa pagbiya mo

Daghan sa mga dapit nga karun akong nasigpatan

Ug hinay-hinay nga mukalabat ang kasakit ning akong dughan

Sa hinungdan nga mahanduraw ko ang atong kagahapon

Apan karun lubog na kini kay natabunan na man sa mga gabon

Gihandum ko nga makalimtan ang kagahapon ta

Kay sa bisan unsang paagi kadto maisip nga lumalabay na

Ang ginaingon nga nanglabay natapos na

Apan sa gihapon dili ko ikalimod nga kagahapon ta gihanduraw ko pa

Kaanugon gayod sa atong kagahapon

Kay katumanan sa mga saad ta kanhi wa nato naangkon

Nagyangu-ngo sa kasakit ang akong kaugalingon

Kay sa sitwasyon ta wa pa man ako “maka-move on”

Tam-is ug pagkahapsay handurawon ang atong mga kagahapon

Apan kasakit akong naangkon kun kanunay ko kining huna-hunaon

Kay dili ko na mabalik ang nangagi na

Ug wala na'y kapuslanan kay panaad ta di na matuman pa

Ang bugtong kong mabuhat mao lamang ang paghanduraw

Paghinumdum sa nanglabay nga mga katuigan nga gihigugma ko ikaw

Paglingi pagbalik sa matam-is tang kagahapon

Apan di ko na man diay ikaw maangkon

Buhaton ko na lamang ang paghikalimot kanimo

Kanimo nga gihigugma unta ug gipangga ko

Huptan ko na lamang ang kasinatian nga akong naangkon

Paningkamutan nga makalimtan ang paghanduraw sa atong mga kagahapon.