Tamparos Sa Kapalaran

TAMPAROS SA KAPALARAN

by Suzeth Mayormita Angana

Nabatyagan mo na ba ang tamparos sa kapalaran?

Gisagpa ka na ba sa tuyaw ug yubit sa kapalaran?

Matag binuhat nga nagpatong ibabaw ning madanlog nga kalibutan

Dili makatago ni makalikay sa tamparos ning kapalaran

Ang tamparos sa kapalaran, nagpasumbingay

Sa mga kasinatian nga mabatyagan sa kinabuhi halayo sa kalipay

Usa sa mga gikahinamang butang nga maangkon sa usa ka tawo mao ang kalipay

Apan lisod kining makab-ot ni maangkon kun luha sa imong aping nagtabisay

Ang tamparos sa kapalaran nagsimbolo sa kapakyasan

Nagsimbolo sa kawad-on, kalisod ilabi na kasakit diha sa imong dughan

Naangkon mo ang kapakyasan tungod kay giluiban ka

Anaa ka sa kawad-on kay wala kay gihuptang kwarta

Anaa ka sa kalisod kay wala kay mahinol sa imong bulsa

Anaa ka sa kasakit kay gibiyaan ug gisalikway ka sa imong hinigugma

Usahay dili matukib sa mga pulong ang tumang kasakitan

Nga gidalit ug gimugna ning tamparos sa kapalaran

Gitamparos ka sa kapalaran kay may oportunidad kang gisayangan

Gitamparos ka sa kapalaran kay may gasa unta nga gidalit sa imong atubangan

Apan imo kining giusikan ug gibalibaran

Kay diay gibasihan mo man ang nanglabay nga kapakyasan

Mahadlok ka nga mutukob sa gidalit nga butang

Kay sa milabay nga katuigan pagbati mo hapit matangtang

Gipakisama mo ang tanang butang nga imong mahinagbuan

Giisip mo sa gihapon nga maangkon mo pagbalik ang kapakyasan

Anaa ang pagduda, kakulba ug pagdumot sa kanhi mong kaagi

Gihuptan mo ang tanang pagtoo nga walay swerte ang imong kinabuhi

Lisod alang kanimo ang pagbukas sa imong kinabuhi ngadto sa uban

Ingon man sa mga butang nga muhatag unta kanimo sa kaayuhan

Gisirado mo ang imong hunahuna sa pulong kaayuhan

Kay diay natagam ka man ug sa gihapon dughan mo samaran

Milabay sa hamubo nga panahon ang mga maayong butang diha kanimo

Apan wa mo kini hatagi ug pagtagad, ug kini mipahilayo kanimo

Diay sa unahan, imong nahinuktukan ug naamguhan

Nga ang maong butang o binuhat imo man diay nga gikinahanglan

Gibuhat mo kutob sa imong mahimo arun kini mahibalik kanimo

Pangaliyupo, pagbakho ug pagmahay giagian ug gisagubang mo

Apan sa gihapon hanap na ang kahigayonan nga maangkon mo pa kadto

Dili masapnay sa imong mga kamot ang tumang pagmahay

Kun nganong giusikan mo kadto nga unta miduol na man unta kini kanimo

Dili maihap sa mga tudlo ang pagbasol nga nagpangamay

Pilit mo mang bugtawon ang maong butang o binuhat

Apan kini wala may interes nga kanimo sa unahan muhulat

Karun! Tan-awa ang kaugalingon mo

Nagapos ikaw sa mga kasakit ug pagbakho

Murag midat-og kanimo ang gibug-aton ning kalibutan

Kay ang maong butang o binuhat di mo na maapsan

Dili mahubad sa mga pulong ang kahasol karun diha sa imong dughan

Mao kana imong naangkon ang TAMPAROS SA KAPALARAN

Gitamparos ka sa kapalaran

Kay unta gihatagan ka man unta sa kaayuhan

Apan gibaliwala mo kini kay nagapos ka man sa imong kaagi

Nagapos ikaw sa kasakit sa imong kinabuhi kanhi

Giusikan mo gayod ang maong butang nga alang unta kanimo

Mao na unta kadto ang tambal nga makapaayo sa balatian mo

Apan gisayangan ug gibaliwala mo man lang

Gitamparos ka sa kapalaran arun makamata ikaw sa kamatuoran

Kamatuoran nga nagmatuod nga kun ikaw napakyas kaniadto

Mahimong dili na kini masubli nga mahitabo sa kinabuhi mo

Gitamparos ka sa kapalaran kay hatagan ka sa pagtulun-an

Sa paghatag ug pagtagad sa mga maayong butang nga imong mahinagbuan

Sakit ang tamparos sa kapalaran

Tamparos nga dulot sa imong panghuna-huna ug balatian

Arun sa ingun mubuka ang imong mga mata

Arun ang mga butang nga mulabay sa imong kinabuhi hatagan mo na ug importansiya

Kun ikaw anaa sa kasakitan karun tungod sa tamparos sa kapalaran

Pag-malig-on sa kanunay, bangon diha sa imong kapakyasan

Ug isilsil sa imong alimpatakan ang kasinatian nga imong natagamtaman

Dili pa ulahi ang tanan, adunap ay kahigayonan nga mulabay kanimo ang swerte sa kapalaran

Hupti ang kamatuoran nga nagkanayon “Kun may kapakyasan, aduna say kadaugan.”