Pagpasaylo

PAGPASAYLO

by Suzeth Mayormita Angana

Pagpasaylo butang nga lisod buhaton

Kun kasing-kasing sa garbo naulipon

Kun garbo ipatigbabaw ta sa atong dughan

Padayon niining paga-ut oton ang atong balatian

Pagpasaylo, hilabihan kalisod maangkon

Kun anaa ang kasingkasing nga madinumtanon

Ug dili gayod makab-ot ang kalinaw

Kun kasilag sa dughan kanunay nagatukaw

Daghang mga relasyon nabugto tungod kay wala ang pagpasaylo

Daghang mga balatian ang nahugno tungod kay wala ang pagkamalumo

Nagkaguliyang sa kaligutgot ug kaguol

Ang matag kasingkasing kay sa pagpasaylo kini nabungol

Walay si bisan usa ang nagpasensiya ug nagpaubos

Kay nangindahay sa garbo nga sa kasingkasing nag-uros uros

Kun wala ang pagpasaylo, kasingkasing kanunay maghapdos

Kun wala ang pagpasaylo, balatian sa kalagot magaantos

Dili ta ikalimod nga naigo kita niini

Adunay mga higayon sa atong kinabuhi nga sa pagpasaylo kita nagdumili

Iyahay kitag pagahiay sa atong balatian

Iyahay kitag patas-anay ug utong nga mupakanaog sa kapasayluan

Gihikli ta ang pagpasaylo, kay dili kita gusto

Nga muuna ug dalit sa pagpangayo ug pasaylo

Nga unta ang pagpangayo ug pasaylo

Butang nga angay dayegon sa mga tawo

Pagpasaylo, bugtong tambal sa kasingkasing nga samaran

Pagpasaylo, hapuhap sa balatian nga sa mga luha naughan

Apan nganu kaha nga malisod man kini pagabuhaton?

Tungod kay mas milabaw man ang pagkamaginarbuhon

Dinhi ibabaw ning kalibutan nga atong nahimutangan

Daghan sa mga katawhan ang nagbaton ug kasilag sa dughan

Usa ka ba sa mga binuhat nga nagbaton sa maong butang?

Usa ka ba kanila nga sa pagpasaylo nagpautang?

Mugamot ang kaligutgot ug kasilag sa dughan

Kun wala ang pagpasaylo nga hinagiban

Mulipang ang dahon sa tumang kasuko

Kun pagpasaylo dili mao ang tumong ug tuyo

Musanay ang kabug-at nga gihambin sa balatian

Kun sa pagpasaylo gidaw-an ug gihikawan

Musilaob ang tumang kasuko nga hilabihan

Bisan sa gamay nga mga isyu masiklan

Musangko sa kagubot ug panagbangi

Kun mag-abot ang duha ka kasingkasing nga sa pagpasaylo nagdumili

Musilaob daw kalayo ang kasuko ug pagdinumtanay

Kun duha ka binuhat sa kasilag nag-apong kay gidaw-an man sa kalipay

Malisod matagamtaman ang kalipay

Kun anaa ang panagbungol ug panag-away

Mahimo kang mupahiyom ni mutalidhay

Apan sulod sa imong dughan anaa ang kasilag nga nagpauraray

Mahitabo kini kun wala ang pagpasaylo ngadto sa imong isigkatawo

Kadtong binuhat nga nasaypan mo ug nakasala kanimo

Lisod papason ang mga lama ug taliti sa kasuko ug kahiubos

Kun diha sa imong dughan anaa ang kaligutgot nga nag-uros uros

Dili mahimong malinawon ang imong pagpakabuhi

Kun ikaw sa kanunay may makaaway ug makasumpaki

Lisod ikinabuhi ang matag higayon ug adlaw

Kun sulod sa imong dughan wala ang pagpasaylo nga gilaraw

Gusto ka bang magkinabuhi nga anaa sa kalinaw ug kamaya?

Pandaya ang relasyon nga tungod sa panagbangi naguba

Batuni ang kasingkasing nga mapinasayloon

Ug sa pagpasaylo andam mudawat ug mutulon

Tunla ang imong garbo arun sa ingun dili hasol ang pamatyag mo

Pasayloa ang nakasala kanimo ug pangayo ug pasaylo sa tawo nga gikabingkil mo

Higugma kadtong nakaaway mo

Hinumdumi ang pulong PAGPASAYLO kay balaan kini nga tulumanon ug sugo.