Anak Ko, Balik Na Dinhi Sa Kiliran Ko

Anak ko, balik na dinhi sa kiliran ko

by Suzeth Mayormita Angana

Anak ko, hain ka na man?

Mao ka nay pangutana nga kanunay nagatukaw ning akong dughan

Dili sayon isip usa ka ginikanan

Nga ang imong anak mahanaw diha sa imong kiliran

Anak ko, gihandom ko ikaw sa kanunay

Mahinumduman ko ang higayon sa imong pagkagamay

Nga ikaw akong giduyan ug sa mga bukton ko gisapnay

Bisan sa tunga sa kagabhion sa imong pagkahinanok ako kanunay kanimong nagbantay

Andam akong mag-antos ug magsakripisyo

Kay ikaw anak ko ug pinalangga ko kaayo

Malipayon kaayo ako kanunay sa sayong kabuntagon

Kay kanunay ka mang mupatong ning akong mga bukton

Gialimahan ko ikaw pag-ayo, pag-amuma sa usa ka ginikanan

Nga andam buhaton ug atubangon ang tanan

Bisan sa pagbatog sa lamok sa imong panit dili ko katugotan

Mao kana ang pagmahal ko kanimo nga dili hintupngan

Minglabay ang mga adlaw ug katuigan

Dako ka na ug aduna nay kaugalingong pagpanglantaw sa unahan

May mga higayon nga kita magkasumpaki

Kay ikaw usahay sa mga tambag ko nagdumili

Kanunay kong gibuhat ang mga butang alang sa imong kaayohan

Kay dili ko gusto nga ikaw mahitumpawak sa kadautan

Gipungan ko ikaw nga dili mukabig sa mga pagpakighugoy-hugoy

Arun ikaw sa kaulahian dili mahimong makaluluoy

Bisan musukol ka na kanako, apan sa gihapon andam akong nagpailob anak

Gipalangga gihapon tika bisan sa tanan kong mga tambag ikaw misupak

May mga higayon nga nilapaw na ang akong nasulti diha kanimo

Apan wa kana magpasabot nga mulungtad kining kaguol ko

Apan anak, wala mo hingsabti ang akong gipangbuhat

Mikagiw ikaw sa halayo ug sa wala ko hiliing dapit

Anak kanunay akong nagmalaumon ug naghulat

Kanunay kong nabati ang kamingaw ug kasakit

Kay ikaw wala na man mubalik sa atong panimalay

Ug karun wala ko na gayod natagamtaman ang kalipay

Kanunay nga mitulo kining akong mga luha

Kay anak sa kadugayon sa panahon wala ko na man ikaw makita

Tumang kabalaka ug kakuyaw kanunay kong nabatyagan

Kay wala ako masayod sa imong kahimtang ug asa ang imong nahimutangan

Sakit kaayo ang pagbiya mo kanamo

Anak, ang kasing-kasing ko karun gihabulan sa kasubo ug pagmulo

Anak ko, balik na intawon ning kiliran ko

Dili na maihap ang mga adlaw nga kanunay akong nagpangita kanimo

Ayaw na intawon paantosa sa kasubo kining ginikanan mo

Kay bililhon ka kaayo ning kinabuhi ko

Anak, hangyo ko lang kanimo nga mupakita ka na kanako

Kalimti ang mga butang nga kita nagkasango

Dili makompleto ang kinabuhi ko, kung wala ka

Mao nga balik na, ug ayaw na intawon ako sa kabalaka paantosa

Anak asa ka na man karun, balik na intawon dinhi sa akong kiliran

Kay nalukop na ang kinabuhi ko sa kasub-anan

Timan-i sa kanunay nga ako andam mudawat kanimo

Kay anak ko ikaw ug ginikanan mo ako

Anak, balik na intawon dinhi ning kiliran ko

Gimingaw na ako kanimo pag-ayo

Ibalik na intawon ang kamaya ning kasing-kasing ko

Nga ikaw mubalik ning kiliran ug makauban ko