Unsaon Ko Man Ikaw Paghikalimot?

Unsaon Ko Man Ikaw Paghikalimot?

by Suzeth Mayormita Angana

Unsaon ko ikaw paghikalimot kun dughan ko sa gugma nagpunay ug kupot?

Unsaon ko ikaw paghikalimot kun kasingkasing ko kanimo lamang nahimuot

Kasingkasing ko sa kapakyasan kanunay nagpalusot

Apan huna-huna ko gikapoy na ug kanunay nagbagutbot

Unsaon ko ikaw paghikalimot kun ania ka pa diay ning dughan ko

Kun panagway mo ania kanunay ning panumduman ko

Ang matag pamilok ning akong mga mata

Kanunay nagpangita kun asa na ka

Sa matag higayon nga ako mag-inusa ra

Mas labaw nga mahuna-hunaan tika

Lisod ka man jud diay kalimtan

Kay ang imong panagway napatik na man ning akong balatian

Unsaon ko man ikaw paghikalimot kun kanunay kong bitbit ang imong litrato

Unsaon ko man paghikalimot kun ikaw kanunay ang gihandom ko

Bisan makauban ko ang ubang mga nilalang

Apan kanimo lamang ang pagbati ko nalaang

Unsaon ko man ikaw paghikalimot kun ikaw lamang akong gihigugma

Nga bisan nagkalagyo na man diay kita

Nga bisan ikaw di na matawag nga akua

Apan sa gihapon gihandom ko ang kagahapon ta

Dili ko mahikli ang paghinumdom kanunay kanimo

Kay nakulit ka man gud ning kasingkasing ko

Nga bisan wala nay puruhan nga magkabalik pa ta

Apan kanunay kong gihanduraw nga kanhi nagkauban kita

Ang dili paghikalimot kanimo naghatag ug hapdos ning dughan ko

Kay paminaw ko ako lamang ang naghuna-huna kanimo

Kay sayod ako nga diha kanimo gikalimtan mo na gayod ako

Nasugid ko kana kay mao man kana ang nasuta ko

Usahay nagamahay ako kun nganong gibuhian ko pa ikaw

Nagamahay ako kay pagbati ko karun naglatagaw

Kay wa ka na man nga kadangpan ning gikapoy kong balatian

Wala ka na nga kasumbungan sa masakit kong kasinatian

Nagpaabot ako sa matag adlaw nga mubalik ka pa kanako

Apan minglabay na ang hataas nga panahon

Apan sa wa ka man gyud mubalik ning kiliran ko

Nga maoy hinungdan nga ako karun nagmasulub-on

Kanunay akong gaatang sa imong pag-abot

Sa pagpangaliyupo ako naningkamot

Arun mupatim-aw ikaw pagbalik ning akong kinabuhi

Apan wa ka na man gyud mupadangat sa imong pagbati

Unsaon ko man ikaw paghikalimot kun tibook adlaw

Ikaw kanunay sa akong pangisip nag-utaw utaw

Kanunay kong gihambin ang paglaom

Nga ikaw kanako usab magbulong

Wala akoy laing mahunahunaan kun dili ikaw lamang

Maong sa paghikalimot kanimo ako dili makasagubang

Kanunay kang gitugon ning akong huna-huna

Ug sa kasingkasing gihigugma ug gipangga

Maglisod ako paghikalimot kanimo kay sumpay pa man ang pagbati ko kanimo

Dili ko maputol kining pagbatia kay bililhon ka man alang kanako

Dili ikaw makalimtan kay dili ka man gayud mapapas ning akong panumduman

Dili man gayud mabanlas sa kalimot ang kagahapon tang naagian

Unsaon ko man gayod ikaw paghikalimot?

Mga adlaw ug bulan naupos na ug nahurot

Apan sa gihapon dili ako kanimo makalimot

Kay diay sa dughan ko misuhop ka man gayod ug midulot