Kanal

KANAL

by Suzeth Mayormita Angana

Dominggo kadto sa hapon

Sa dihang anaa ang nagdagitom nga mga dag-om

Ug hinay-hinay nga mihuyop ang mabugnaw nga hangin

Nga daw nakulbaan ako sa makadiyot kay tingali matinuod ang akong pamasin

Nga muosab na pud ang gikahadlokan nga panghitabo

Kun diin kadtong maong dapit, apektado ang tanang lumulupyo

Sa paglibot-libot nako sa maong dakbayan

Ako gayong nasaksihan ug namatikdan

Ang inanay nga pagbundak sa makusog nga ulan

Wa ako mamasilong, kundili nagpundo ako sa kilid sa dalan

Ug akong giobserbaran ang mga kanal

Nga anaa ang makusog nga bunok sa tubig nga nag-akal -akal

Makapanimbawot sa balahibo ang maong panghitabo

Kun diin ang mabug-at nga lugas sa ulan mipadayon pagtulo

Ug mibugwak ang makusog nga agay sa tubig

Inubanan sa nagtapun-og ug nakalain-laing basura ug gubang kamalig

Pagkahugaw sa kanal! Ug bisan asa na lamang muipsot ang mga katubigan

Tungod kay adunay daghang nabara nga mga basura sa agianan

Ang nagpungasi nga mga katubigan kalit lamang miapaw

Ug sa hayan ang mga katawhan nagdali-dali ug katkat sa ibabaw

Miawas ang mga kanal tungod sa kakusog sa ulan

Ug apektado gayod ang tibuok katilingban

Kun gitagaan lang unta kini sa maayong pagtagad ug pag-amuma

Hayan ang mga katawhan dili gayod maunsa

Apektado gayod ang mga tawo ilabi na ang mga kabataan

Ang kalimpyo unta sa mga kanal matagamtaman unta sa katilingban

Kini hatagan ug maayong pagpakabana ug pagpakisusi

Ilabi na sa mga tawo nga sa panahon sa eleksyon magngisi-ngisi

Kinahanglan hatagan kini ug dakong impotansiya

Nga kalimpyo sa mga kanal sa mga katawhan igasa

Lihok kadtong adunay gihuptang pwesto sa gobyerno

Aron sa kaulahian kamu dili pagabasulon sa daghang tawo.