Kun Ako Ba Siya?

Kun Ako Ba Siya?

by Suzeth Mayormita Angana

Ako siya karung mga panahona

Ako pa ba gihapon siya sa umaabot?

Ako pa ba siya inig abot sa panahon

Nga akong gikahinaman diin ako gayod magmalipayon

Aduna ako'y kabalaka, linibuan ka mga pangutana

Kun ako ba siya sa panahon nga gitakda

Sayod ang akong kasing-kasing ug huna-huna

Nga kaniya ko lamang gihulad kining akong gugma

Sa matag pagpamilok ning adlaw ug gabii

Kanunay kong gihandom nga ako siya sa unahan

Ug gugma nga naghugpong kanamo dili gayod ihikli

Kay siya lamang ang nagbatog ning akong balatian

Sayod ang mga bituon sa kalangitan

Nga gugma ko siya lamang ang natingban

Hinagawhaw ning nagpuyo kung balatian

Kaniya lamang nagmaya kun siya akong makauban

Gibati ko ang dili kapugngan nga pangagpas

Kun siya ba ang mahimo kung kapikas

Apan dili ko usab ikalimod nga aduna ako'y kabalaka

Kay tingali dili kami ang gitagana sa usag-usa

Panganduyon ko man galing nga kami sa katapusan magkauban

Apan kanunay mupatim-aw ang pangutana

Kun ako ba siya gihapon sa kaulahian

Oh! nabatonan ko ang kakuyaw ngadto kaniya

Kay sayod man ako nga adunay mga binuhat

Nga sa iyang kaanyag nakalitan ug nakurat

Daw-an ko man ang ubang mga nilalang

Arun sila sa iyang kaanyag mangindahay ug mag-atang

Gikahadlukan ko gayod ang kamatuoran

Nga mahimo siyang pagaagawon ug labnihon sa uban

Kay dili ko pa man sinilyuhan ang iyang dughan

Nga nagmatuod nga mahimo nga makabig siya sa uban

Aduna pa siya'y hingpit nga kagawasan

Sa umaabot ako mahimong iyang talikdan ug biyaan

Nahadlok ako sa akong mga pagduda

Kun ugma ug sa umaabot ako pa ba siya?

Dili malikayan ang pagbati nga kanunay nakuyawan

Kun gani mapakyas ako sa pangandoy nga maako gihapon siya sa kaulahian

Nagpungasi sa kanunay ang naghaguros nga mga panghuna-huna

Kun sa umaabot nga mga adlaw ug takna

Magpabilin pa ba gihapon siya ngari kanako

Nga sayod man ako nga adunay siya'y kagawasan pagpili sa laing tawo

Gusto ko na man unta siyang gapuson ning akong dughan

Apan wa ako'y igong katungod arun kini karun matuman

Dili kapugngan ang kakuba ning dughan

Nga nagpangagpas sa mahimong mahitabo ngadto sa unahan

Kay ang pangandoy nga siya maako hangtod sa katapusan

Mao may gihandom ug gipangamuyo ning balatian

Naglatay sa kakuyaw ang mahimong linundagan niining tanan

Kay ang tumang kabalaka nga siya mahanaw kanako dili man malikayan

Oh! halayo nga mga bituon sa kawanangan

Mahimo ba ninyo akong tubagon sa makadaghan

Kun ako ba siya, kun iya ba ako?

Halos dili na ako makalitok sa mga pangutana

Tungod kay napuno na ako sa tumang kabalaka

Kun maako ko ba gayod siya