Naughang Sapa

NAUGHANG SAPA

by Suzeth Mayormita Angana

Niadtong likod sa baga nga kasulupan

Diha ko nakita ang nagtubod nga katubigan

Nagtulo sa daghang tubig ang mga gamot sa kakahuyan

Ug anaa ang mga lab-as ug lapyo nga mga tanaman

Anaa usab ang nagtimpasaw nga mga isda

Sa tab-ang nga tubig; diha sa tin-aw nga sapa

Naggukdanay ang mga higop-higop sa palibot

Kay sa kaanyag sa lugar sila nahimuot

Pagkaanindot paminawon sa mga awit sa mga kalanggaman

Nga mibatog sa mga sanga sa hataas nga kakahuyan

Anaa usab ang nagkadaiyang tingog sa kalasangan

Nga naghatag ug kasadya diha sa kasapaan

Makita usab ang nag-utaw utaw nga mga pito pito

Diha haduol sa mga gagmay ug dagko nga mga bato

Anaa usab sa daplin nanuba ang mga buyog

Kay sa katahum sa mga kabulakan sa kilid sa sapa naibog

Pagkaanindot ug pagkatin-aw gayod sa sapa

Mahimo ka nga makapanamin sa katin-aw niini

Makaplagan mo usab ang timgas nga mga lawa-lawa

Nga anaa sa lapyo nga mga dahon sa kamote

Pagkabugnaw gayod sa hinuyop sa hangin

Pagkahayahay kun ikaw didto magpabilin

Hulagway sa usa ka gingharian ang maong sapa

Kay didto ang maanyag nga lugar nga di mo sagad makita

Mibiya ako sa maong sapa bit bit ang saad

Nga ako mubalik ngadto kay nabatunan ko ang tumang pagtagad

Nadani ako sa kaanyag sa maong sapa

Kay mao kadto ang unang higayon nga kadto akong nakita

Wa ako maglangan ug mag-usik sa panahon

Mibalik ako didto sa sapa nga akong gihandom

Nakuratan ako sa akong nasaksihan

Kay ang sapa nga maanyag sa tubig kini naughan

Gibukutan sa abog ang maong dapit

Nangliki ang mga yuta sa kauga nga sa ulan nagpanampit

Nagsiyagit ug nagtiyabaw ang mga langgam nga bahaw

Tungod sa kainit ug kauhaw

Naughan ang maong maanyag nga sapa

Ug ang nagdagayday nga katubigan di na makita

Ang mga pag-ambak sa katubigan di na madunggan

Wala nay kasikas sa sapa nga mabatian

Ang mga lapyo nga tanaman daplin sa sapa nangalawos

Ug sa kauhaw sa tubig naghandom ug nang-antos

Pagkaalaot sa maong maanyag nga dapit

Kay ang nag-agay nga katubigan nanamilit

Naghilak sa kauhaw ang sapa

Kay ang mga katubigan sa hingpit nawala

Ang dinaguok sa katubigan dili na mabati

Ug ang kaanindot sa lugar napusgay na ug natiti

Ang kaanyag sa maong dapit

Nawala ug di na makita pa sa hingpit

Mao kadto ang talinghaga nga akong nasaksihan ug nakita

Didto sa naughang sapa