Unta Sa Umaabot Nga Panahon, Kita Pa Gihapon

UNTA SA UMAABOT NGA PANAHON, KITA PA GIHAPON

by Suzeth Mayormita Angana

Dili matukib sa mga pulong ang akong pagkamalipayon

Sa dihang nagkatakdo ang pagbati tang bulawanon

Wala ako magdahum nga nagkahiusa ang atong tagsa tagsa ka paghigugma

Kay sulagma lamang ang higayon nga nakauban ka

Daghang binuhat ang mialirong sa imong kasingkasing

Daghang mga binuhat nga sa paghigugma kanimo mikaging

Apan wala ako magpakawa sa paglaum

Kay gilauman ko man gayod nga paghigugma mo akong maangkon

Ganti nga walay ikatandi ang akong nakab-ot

Sa dihang sa paghigugma ko kanimo ikaw nangilabot

Aduna ka man pud diay pagpakabana

Sa akong pagkamatinud-anon ug nagpangamay nga pagpangga

Sa laktod nga pagkasulti, iya ta ang tagsa-tagsa

Gidawat mo ang akong bug-os nga paghigugma

Ug gihalad ko usab kanimo ang gugmang walay paglubad

Kay pagpangga ug pagmahal kanimo ako dili makabalibad

Mikabat sa gatusan ka mga adlaw

Nga dughan ta adunay managsamang gilaraw

Nabatunan ta ang pagsinabtanay ug pagminahalay

Kay aduna man kita'y managsamang kalipay

Gihatagan mo ako sa hustong pag-amuma

Gigahinan mo ako sa imong matam-is nga katawa

Gipuno mo ako sa imong pagkamaayo

Kay gipangga ug gihigugma mo man ako

Sa ingun, gihatag ko usab kanimo

Ang matuod nga bulok ning pagbati ko

Gipabati ko kanimo ang tim-os nga paghigugma

Ug dili ko gayod ikatugot nga sa kinabuhi ko mahanaw ka

Sobrang kamaya ang gibati ning akong dughan

Kay aduna man kitay managsamang hinagawhaw ning atong balatian

Duha kita, apan nahimo kitang usa

Kay pagbati ta sa usag-usa hiniusa

Nagmalaumon ako sa matag takna ug higayon

Nga unta sa umaabot nga mga panahon kita pa gihapon

Kay dili ko kaya nga mawala ka ning kiliran ko

Kay naggagikan kanimo ang kalipay ning dughan ko

Unta sa umaabot nga mga panahon kita pa gihapon

Nga pagsinabtanay ug pagminahalay ta kanunay magkauyon

Nga bisan may musulod nga mga pagsulay

Padayon nga kitang duha kanunay magminahalay

Unta sa umaabot nga panahon kita pa gihapon

Nga mag-uban, magtan-aw sa nagpangidlap nga mga bituon

Kay didto ta ipasupot ang atong mga pangandoy

Arun pagbati sa usag-usa magpabilin ang kaluoy

Unta sa umaabot nga panahon kita pa gihapon

Arun padayon tang matagamtaman ang pagkamalipayon

Kay sayod man ako nga ikaw lamang ang kalipay ning dughan ko

Ug nganhi mo lang kanako mabatyagan ang matuod nga kalipay mo

Unta sa umaabot nga panahon kita pa gihapon

Arun naipon tang mga panahon sa pagminahalay dili maanugon

Kay sa kataas sa takna nga nakauban ko ikaw

Dili ikatugot ning kasingkasing ko nga gugma ta mahanaw

Unta sa umaabot nga panahon kita pa gihapon

Arun ikaw ang madala ko sa salag sa kaminyoon

Arun matuman ang atong mga saad ug panumpa

Nga ang usag-usa ta dalitan sa tim-os nga pagmahal ug pagpangga