Pinangga, Nganong Gibiyaan Mo Ako?

PINANGGA, NGANONG GIBIYAAN MO AKO?

by Suzeth Mayormita Angana

Oh! Pinangga nganong gibiyaan mo ako?

Nganong puro kasakit man kanako ang gipatagamtam mo?

Nganong gipalaom mo man ako sa wala?

Ako kalit lamang mong gipapas sa imong huna-huna

Nganong mitugot ka man

Nga pagasamdan ang akong dughan?

Nganong wa ka may kaikag

Nga pagbati ko imong gibihag?

Gihatag ko man unta kanimo ang tanan

Nga bisan pag kaugalingon ko usahay masakitan

Giantos ko ang angay alantuson

Ug gisagubang ang tanan bisan nagkaingun-ingon

May mga panahon nga masud-ipan na gali ako

Sa mga pagyubit ug pagtamay mo

Mataliguk-an na man gane usahay ako

Tungod kay pagkatawo ko sa hayan gisalikway mo

Abi ko ba'g unungan mo ako sa katapusan

Nga pagbati ug pagtagad ko imong pagaampingan

Nga diha kanimo, luha dili ko gayod maangkon

Kay nagtoo man ako nga diha kanimo, ako magmalipayon

Ug sa imong mga bukton, ako pahanday-handayon

Ug sa imong mga gakos, ako patulugon

Ug sa mga matam-is mong pahiyom

Ako makabaton ug kusog ug paglaum

Nagtoo ako nga sa umaabot ng mga panahon

Ako imong pagadad-on sa salag sa kaminyoon

Ug bisan sa nag-uros-uros nga mga pagsulay

Ako imong unungan tungod kay kini mao imong kalipay

Gihikli ko ang tanan nga mga pagduda

Nga bisan sa naangkon kong kahimtang wa ko na lang gani tagda

Kay murag pagtagad mo kanako wa nay gana

Ug imong paghigugma kanako minglubad na

Gihimo kong kusog ang imong kaluya

Ug giantos ang tumang kasakit nga gugma ko wa mo na tagda

Gipaninguha ko nga sa matag higayon makauban ka

Ug pagbati ko ug pagbati mo kanunay managsama

Gipangamuyo ko usab nga pagbati ko hingsabtan mo

Kaw ikaw ang gugma ug paglaum ko

Apan! Ngano man nga ako sa kaulahian

Imo man akong gitalikdan ug gibiyaan?

Nganong gilabni mo man ang akong kalipay

Karun sa kaulahian nabatonan ko ang pagmahay

Tumang kahapdos sa dughan ang naangkon ko diha kanimo

Oh! akong pinangga nganong gibiyaan mo ako?