Kulang Pa Ba?

KULANG PA BA?

by Suzeth Mayormita Angana

Kulang pa ba ang tanang gibuhat ko?

Kulang pa ba ang pagpangga ug pagmahal ko kanimo?

Kulang pa ba kay hangtod karun gipaantos mo pa man ako

Nga unta ikaw lamang ang gihandom niining kasing-kasing ko

Hulagway sa kawad-on sa kalipay kining kinabuhi ko

Tungod kay wala mo man gahini ug gibug-aton kining pagbati ko

Hinulad gikan sa kasing-kasing ko

Kining nabatyagan ko nga gugma alang kanimo

Gipakita ko kanimo ang akong pagkamatinud-anon

Aron pagminahalay ta magmalungtaron

Bisan gisagpa ako sa mga kasakit

Nga ikaw sa uban usahay nahilambigit

Matod mo tawo ka lang nga masayop

Matod mo wa mo tuyua nga sa sala ikaw mihuyop

Tuod man gidawat ko gihapon ikaw

Bisan may masakit kang binuhatan batok kanako nga gilaraw

Sama sa gihapon wa ikaw magtagam

Kay kasakit sa gihapon kanako imo mang gipatagamtam

Nakigsuod ug nakigkuyog ka kaniya

Bisan gisabutan ta man unta nga kita lamang duha

Nalimtam mo na ba ang gisaad mo?

Nga matod mo ako lamang ang higugmaon mo

Nga bisan manghulpa pa ang kawanangan

Ikaw magpabilin kanunay ning akong kiliran

Gituohan ko dayon ang mga gipamulong mo

Kay abi ko ba nga dili mo kaya nga pasakitan kining dughan ko

Mao nga tanang pagsabot ug pagpailob gihatag ko kanimo

Ug ikaw lamang gayod ang gihigugma ko

Apan ang tanang paghigugma ug kaayo ko

Gisuklian mo sa kasakit kay giluiban mo man diay ako

Padayon mong gibuhat pag-usab ang pagluib

Diha-diha, padayon usab ang kaguol nga sa dughan ko nanggitib

Milipang ang maong kaguol ug kahiubos

Kay ako kanunay mo mang sa kasakit gipaantos

Dili maihap sa mga tudlo ang pagpasakit mo kanako

Dili matimbang ang gibug-aton sa luha sa mata ko nagpunay sa pagtulo

Apan sa gihapon gipatigbabaw ko ang paghigugma

Kay dili ko ikatugot nga sa kinabuhi ko mubiya ka

Giantos ko ang tanang mahait nga kasinatian

Ug gidawat kini ingon nga mao kini ang akong kapalaran

Kun palad ko man nga mag-antos tungod kanimo

Dawaton ko sa hingpit lamang makita mo ang gugma ko

Martir man ako sa mga mata sa katawhan

Pilit kong gidawat ang maong kamatuoran

Yubiton man ako nila tungod kanimo

Bukas sa kanunay ang kinabuhi ko sa pagdawat kanimo

Karun, lab-as pa ang mga samad ning akong dughan

Tungod kay nahigugma ka man pag-usab sa uban

Kulang pa ba ang tanang pagpasaylo ko kanimo?

Kulang pa ba diay ang tanang pagpaubos ko

Kulang pa ba diay ang kaayo nga gidalit ko kanimo?

Tubaga ako, kulang pa ba?