Kamingaw

Kamingaw

by Suzeth Mayormita Angana

Kamingaw sa akong pamatyag

Sa dihang mga dalan ta nagkabulag

Nganong nakaako ka man

Nga ako imong gibiyaan?

Ug ang mas labing sakit pa

Ikaw may lain ng hinigugma

Kamingaw sa akong kinabuhi

Diin tingog mo dili ko na mabati

Mabungol ako sa tumang kamingaw diha kanimo

Tungod kay giisip ta man ka nga kinabuhi ug kalipay ko

Apan haw-ang ang akong nahiagoman karun

Kay ikaw sa laing binuhat giangkon

Nagtiyabaw ug nagping-it sa kahapdos kining dughan ko

Nga kanunay lamang nagpangita ug nagmingaw kanimo

Gusto ko man unta masaksihan ang imong mga talidhay

Apan unsaon ko man nga ako giisip mo man nga imong pagmahay

Kamingaw sa tibook kong pagkatawo

Kun dili ko na man lang gane maaninag ang imong anino

Gibati ko ang nagpungasi nga kamingaw

Kay sa presensiya ko ikaw sa dayon nahanaw

Anaa ako sa kamingaw nga dili katambalan sa uban

Kay ikaw ra man ang natingban ning akong dughan

Kamingaw sa akong pagpakabuhi dinhi ibabaw sa yuta

Kun pananglit sa unahan dili ko na ikaw makita

Gipangandoy ko man unta nga gukdon ka

Bisan unsa kalayo, pangitaon ug apason ka

Kay kamingaw sa akong dughan

Dili nalim ug hapdos perme akong matagamtaman

Kun mahimo ko pa lang patagon ug lumpagon ang kabukiran

Buhaton ko aron sa hingpit ikaw akong makit-an

Kun mahimo ko pa lang langyon ang dagat nga nag-ulang kanato

Buhaton ko kana aron ikaw sa hingpit maako

Bisan dili masukod sa metrosan ang atong kalagyo

Apason ta gayod ka aron pagbati ta magkatakdo

Latason ko ang halapad nga kamingawan

Aron sa ingun ikaw mahibalik sa akong kiliran

Apan! Ulahi na ang tanan

Kay ikaw gipanag-iya na man sa uban

Kamingaw gayod sa gibati ko

Bisan sa unsang paagi ikaw dili na mabawi ko

Daw nabalaw na ako sa tumang kamingaw

Kay kasing-kasing ug huna-huna ko, ikaw lamang ang gihagawhaw

Dawaton ko na lang kining maong kapakyasan sa hingpit

Arun kamingaw sa dughan ko dili na magsiyagit

Oh! Kamingaw diay kun sa kinabuhi ko wala ka

Kamingaw gud diay kun ikaw sa kiliran ko wala na

Kamingaw gud diay kun ikaw dili ko na magakos

Kamingaw... mao kini karun sa kasing-kasing ko nag-uros-uros