Husto Na

HUSTO NA

by Suzeth Mayormita Angana

Husto na, husto na, nakadungog ka ba?

Husto na, wala ka ba makonsensiya?

Husto na, nagusbat na kining dughan ko

Kay nagpunay ka man niini ug tunglo

Husto na, nabungol na ako sa mga pagtamay mo

Husto na, nadunlan na ako sa pagpanghimaraot mo

Husto na, sakit, sakit na kaayo ang gibuhat mo

Husto na, nabuak na kining kasing-kasing ko

Matag higayon nga anaa ka sa akong duol

Kanunay mong gipatagamtam kanako ang tumang kaguol

Kanunay mong gibaid ang imong espada

Arun sa pagtigbas ning dughan ko nga kanimo adunay dakong paghigugma

Nagsimbolo sa espada ang imong gibuhat

Diin gipakita mo kanako nga ikaw may gugma ngadto sa laing binuhat

Gikunis-kunis mo ang akong kasing-kasing

Kay dihang nasayran ko nga ikaw sa uban nag-iring-iring

Gihikyad mo kanako nga siya mas gihigugma mo

Gidul-it mo sa akong mga mata nga gikalimtan mo ako

Daw sama ra nga nahulog ako sa lalom nga gahong

Ug dili na makalingkawas ug makaginhawa ug tarong

Gituklod ug gisalibay mo ang akong kaugalingon

Arun sa kapakyasan ug kagul-anan maulipon

Tanang masakit ug hapdos nga kaagi

Ako nakatagamtam ug nakasaksi

Ikaw ang nangunay pagbuntog kanako

Ug kasing-kasing ko imo pa gayong gibugno

Wala ka magduha duha pagpasakit kanako

Ug kalipay mo gayod ang akong pagmulo

Katagbawan mo diay ang kapildihan ko

Mao nga padayon mong gilungkab ang kasing-kasing ko

Kanunay kang naghimo ug mga sitwasyon

Aron luha ko imo gayong patuloon

Wala ka pa ba diay matagbaw sa gipangbuhat mo?

Kay hangtod karun naningkamot ka man nga pagatumbahon ako

Gani, usa niaana ka higayon

Ikaw kanako may pagtagad nga maluluy-on

Apan wa ako masayod nga luyo niadtong kaayo mo

Nag-ugom diay kini ug daotang plano

Luyo sa imong temporaryo nga pagtagad ug kaluoy

Ang kinabuhi ko sa pagkakaron nahimong makaluluoy

Kay diay nahaylo ako sa gipakita mong kaayo

Kay diay plano mo nga pasakitan ug linglahon ako

Naghudyaka ka niadtong nagkamang ako sa kasakit

Gikalipay mo ang higayon nga natilawan ko ang kinabuhing pait

Gitiwasan mo ug lambos ang mitakilid kong dughan

Ug nabuy-od ug nahulpa kini diha sa imong atubangan

Sama sa gihapon, gipaningkamutan ko nga mupaduol kanimo

Aron sa gihapon makita ko bisan na lamang ang imong anino

Wala ka gayod magtagam sa mga gipangbuhat mo

Kay bisan dili na maihap ang pagpasaylo ko kanimo

Gibuhat mo pa gihapon ang pagluib kanako

Ang kahiubos ko kanimo daw sa langit misangko

Husto na! Undanga na intawon ang pagsakit mo kanako

Husto na! Ihatag mo na unta kanako ang kalipay dili ang pagmulo

Dili na ako makasugakod sa pag-antos nga gisangon

Kay kasing-kasing ko karun nagmaluyahon

Husto na! Husto na! Nadunggan mo na ba?

Husto na! Asa kutob kasakit kanako mualima?

Husto na! Dili ko na hapit makaya kining tanan

Husto na! Kanus-a mo man ako sa pagpasakit undangan?