Ikaw ug Ako sa Tanang Panahon

IKAW UG AKO SA TANANG PANAHON

by Suzeth Mayormita Angana

Ikaw ug ako sa tanang panahon

Ikaw ug ako sa tanang higayon

Ikaw ug ako... ug wala nay lain pa

Kay ikaw lamang ning kasingkasing ko gihigugma

Ikaw ug ako sa kalipay ug kasakit

Magkauban ug magtimbayayungay

Ikaw ug ako sa tagsa tagsa dili manamilit

Kay ako imong kalipay ug ikaw usab ang akong kalipay

Ikaw ug ako sa panahon sa paghudyaka

Ikaw ug ako bisan sa panahon sa pagpanudya

Ikaw ug ako kanunay magkauban

Ikaw ug ako ang usag usa lamang ang gitagan- an

Ikaw ug ako magpabilin ulan man o mainit

Ikaw ug ako bisan mag-abot pa ang yuta ug langit

Ikaw ug ako bisan sa kalinaw ug kasamok

Kay ikaw ug ako ug magkauban mukagiw man ang kahadlok

Ikaw ug ako kanunay maghuptanay

Arun dili mapakgang ang tagsa tagsa tang pangindahay

Kay diha kanimo, magmalig – on ako

Ug lauman ko usab nga diri kanako daw sama niana ang bation mo

Ikaw ug ako haum alang sa usag usa

Kay gibugkos man kita sa managsamang paghigugma

Gihuptan kita sa malig-on nga panag-uban

Kay wa man kita mangandoy nga adunay pagabiyaan

Ikaw ug ako taming alang sa usag usa

Kay magdungan kita nga pagkangun ang muhasmag nga mga problema

Hinulad kita sa matuod nga pagbati

Mao nga panagkuyog ta dili sa panagbulag mahasuhi

Ikaw ug ako buhing ehemplo sa panaghigugmaay

Kay wala man kita nagpadala sa linikit nga mga pagsulay

Malig – on kita nga mibarog ug nanlimbasog

Kay tagsa tagsa ta gilibutan sa kaisog

Kaisog arun atubangon ang mga kasakitan

Kaisog arun hasmagan ang kapaitan

Kay diha kanatong duha

Anaa ang nagkalayo nga paghigugma

Kini nagpakita nga kita makalingkawas

Sa bisan unsang pagsulay nga kanato muhampas

Kay kita hiniusa man sa malig – on nga paghigugma

Paghigugma nga walay pagkapapas bisan sa unsang taknaa

Ikaw ug ako nagkahulugan sa gugmang walay katapusan

Ikaw ug ako larawan sa dili mapusgay nga balatian

Ikaw ug ako nagpasumbingay sa matuod nga kalipay

Kay halayo man kanato ang kasakit ug pagmahay

Ikaw ug ako sa tanang panahon

Ikaw ug ako gimugna arun magkadayon

Ikaw ug ako karun nahimong managtiayon

Kay gihiusa na man sa gugmang mulahutay sa dayon

Ikaw ug ako perpekto nga parison

Kay sumpay na ang kinabuhi ta karun

Ako gayod sa imong kiliran nagmalipayon

Kay ikaw masinabuton man ug mahigugmaon

Ikaw ug ako sa tanang panahon

Kay magkauban kita hangtod maupos ang gutlo ug higayon

Mapasigarbohon ako kaayong muingun

Ikaw ug ako sa tanang panahon