Gihigugma Ko Ikaw

GIHIGUGMA KO IKAW

by Suzeth Mayormita Angana

Gihigugma ko ikaw, pagbati nga wala gayoy makalabaw

Putli ang kasing-kasing ko nga sama sa sapa nga matin-aw

Bulawanon ang matag takna nga ikaw anaa sa akong kiliran

Kay katagbawan ko man nga ikaw akong makauban

Gihigugma ko ikaw, pagbati nga dili mulubad

Kay kini sa kamatuoran ug kaangayan nagasukad

Kalipay ko nga ako sa kinabuhi mo makaalagad

Ug gipangandoy ko nga ako magahinan mo sa pagtagad

Gihigugma ko ikaw sa tibuok kong kasing-kasing ug huna-huna

Ug dili ko ikatugot nga sa kiliran ko ikaw mawala

Ikaw ang akong sinugdanan ug katapusan

Ug paningkamutan ko gayod sa kaayo ikaw akong mahalaran

Ikaw ang binuhat nga naghatag ug bulok ning kinabuhi

Ug kanimo ko lamang gayod nabatyagan ang tinuod nga pagbati

Gihigugma ko ikaw adlaw ug gabii

Ikaw lamang ang gihigugma ko karon ug kanhi

Higugmaon ko ikaw bisan dili na musilang ang adlaw

Magpadayon ako sa paghigugma kanimo bisan tanang butang kanako mangahanaw

Ikaw ang tanan alang kanako

Ug bugtong ikaw lamang nga sa kasing-kasing ko makamando

Gihigugma ko ikaw, pagbati nga dili matapos

Kun wala ka, sa kamingaw ako malumos

Ug ikaw lamang ang nagahatag kanako ug pulos

Ug diha kanimo, nangapapas ang tanan kong mga pag-antos

Gihigugma ko ikaw bisan mihasmag pa kanako ang malisod nga sitwasyon

Kay ang paghigugma ko kanimo maoy nagahatag kanako ug kalig-on

Gihigugma ko ikaw nga dili matugkad sa bisan unsang paagi

Ug bunga sa paghigugma ko lamang kanimo ang akong masulti

Ikaw lamang ang binuhat nga makaabli ning sirado kong dughan

Kay diha ko man lang kanimo nakit-an ang yabi ning akong balatian

Dili malungkab sa laing nilalang kining paghigugma ko kanimo

Kay gikadinahan na man kini sa pangalan ug pagbati mo

Ikaw ang akong kalipay bisan tamparuson pa ako sa mga kasakit

Makabaton ako ug kusog kun pangalan mo akong masampit

Ikaw ang taming ning akong kinabuhi

Ug paghigugma ko dili gayod matumpag ug mabali

Gihigugma ko ikaw karun ug sa umaabot

Ug paghigugma ko kanimo dili gayod muhubas ni mahurot

Gihigugma ko ikaw bisan naglatay ako dalan sa kakuyaw

Ug kun mupalayo ka man kanako, andam ako aron kanimo mubugtaw

Kun pananglitan talikdan ug biyaan mo ako

Himoon ko ang tanang paagi arun sa pag-apas kanimo

Kun pananglit hikalimtan mo ang paghigugma ko kanimo

Buhaton ko ang pagpahinumdom nga ako nahigugma sa tinuoray diha kanimo

Bisan lamyon pa man sa pagsulay ang akong paghigugma kanimo

Andam kong ihalad ug ipaon ang kinabuhi ko

Arun sa ingon masuta ug masayran mo

Nga ako kanunay nahigugma ug nagmatinud-anon diha lamang kanimo

Gihigugma ko ikaw butang nga angay mong timan-an

Ayaw itugot nga dagiton sa kalimot ang akong nabatyagan

Kay diha ko lamang kanimo naangkon ang matuod nga kadaugan

Ikaw ang kalipay ug kamaya ning akong dughan

Gihigugma ko ikaw saad nga walay kinutoban

Gihigugma ko ikaw, imo na ba kining nasayran?

Gihigugma ko ikaw dili tungod kay hitsuraan ka

Gihigugma ko ikaw dili tungod kay adunahan ka

Gihigugma ko ikaw sa imong pagka-ikaw

Gihigugma ko ikaw kay sa tanan ikaw ang mas labaw

Labaw ang gibati ko kanimo nga paghigugma

Gihigugma ko ikaw, ikaw ug wala nay lain pa